Astanada taýyq jumyrtqasy negizsiz 400 teńgege deıin kúrt qymbattaǵan
ASTANA. QazAqparat - Astanada taýyq jumyrtqasy negizsiz 400 teńgege deıin kúrt qymbattaǵan. Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi brıfıngte QR UEM Tabıǵı monopolııalardy retteý jáne básekelestikti qorǵaý komıtetiniń tóraǵasy Serik Jumanǵarın málim etti.
«Naqty taýyq jumyrtqasy baǵasynyń kúrt ósýine qatysty mynany atap ótkim keledi. Jumyrtqa negizinen óz elimizde óndiriledi. Sondyqtan da onyń kúrt qymbattaýyna (10 danasynyń 400 teńgege deıin qymbattaýyna) esh negiz kórip otyrǵan joqpyz», - dedi ol BAQ ókilderiniń saýalyna oraı.
Aıta keterligi, buǵan deıin elordadaǵy sýpermarketterde 10 dana jumyrtqanyń 400 teńgege deıin qymbattaǵandyǵy habarlanǵan bolatyn. Al osydan 2 apta buryn ǵana on dana jumyrqany 240 teńgege satyp alýǵa bolatyn.
S.Jumanǵarınniń sózine qaraǵanda, qazaqstandyq jumyrtqa óndirýshiler esh negiz joqtyǵyna qaramastan óz ónimderiniń qunyn arttyrýǵa únemi tyrysyp keledi.
«Bizde jumyrtqa óndirýshilermen únemi kúrdeli qarym-qatynas ornap tur. Sebebi teńgeniń dollarǵa baǵasy ózgergenge deıin bizder SQO men Aqmola oblystarynda jumyrtqa óndiretin kompanııalarǵa qatysty tergeý amaldaryn júrgizgen edik. Bul bıznes qoǵamdastyq tarapynan óte aýyr qabyldandy. Biraq, bizdiń ustanymyz mynadaı: eger baǵa kóterilgen bolsa, onda biz tekserýge shyǵamyz. Biz baǵa ymyralastyǵyn anyqtaıtyn bolsaq jazalaımyz», - dedi ol.
Komıtet basshysy qazirgi ýaqytta ekonomıka jaǵdaıyna baılanysty baǵalar óse bastaǵandyǵyn da jasyrmady.
«Ol azyq-túlik taýarlary, janar-jaǵar maı jáne dári-dármek baǵalary. Memleket basshysy áleýmettik mańyzy bar taýarlardyń baǵalaryna monıtorıng júrgizý, qajet bolǵan jaǵdaıda áleýmettik álsiz toptarǵa kómek kórsetý týraly aıtty. Mundaǵy bizdiń ustanymyz - óńirlerdegi birinshi qajetti taýarlardyń baǵalaryn tekserý jáne nátıjesi boıynsha tekserý júrgizý. Tekserýdiń basty maqsaty - baǵalardy ósirýge negiz bar ma, álde ósirýge negiz joq pa anyqtaý», - dedi S.Jumanǵarın.
Onyń sózine qaraǵanda, shaǵyn jáne orta bıznes sýbektilerine baǵany keliskeni úshin alǵan tabystarynan 3, iri bızneske 5 paıyz mólsherinde aıyppul salyndy.
