Astanada táýlik ishinde 100 jol-kólik oqıǵasy tirkeldi
ASTANA. 28 shilde. QazAqparat - Astanada bir táýlik ishinde 100 jol-kólik oqıǵasy tirkeldi, 6 adam zardap shekti, dep habarlaıdy elordalyq saıt Astana qalasynyń Jol polıtsııasy basqarmasyna silteme jasap.
26 shilde kúni tańerteńgi saǵat 8.10-da «Toıota Raf-4» kóliginiń júrgizýshisi Beıbitshilik kóshesinen Bógenbaı batyr dańǵylymen Jeltoqsan kóshesine bara jatqan kólik retteletin jaıaý júrginshiler ótkelinde 37 jastaǵy áıeldi basyp ketken. Oqıǵa saldarynan zardap shegýshi aýyr jaraqattarmen aýrýhanaǵa jetkizildi.
Kelesi JKO-ǵa jaıaý júrginshi kináli bolyp otyr. Tańerteń saǵat 9.00-de elordanyń sol jaǵalaýynda «Toıota» kóligi Qoshqarbaev kóshesindegi úıdiń aýlasynan shyǵa beriste ruqsat etilmegen jerde joldan ótpek bolǵan 30 jastaǵy áıeldi qaǵyp ketken. Jaıaý júrginshi túrli jaraqattarmen aýrýhanaǵa jetkizildi.
Baspasóz qyzmetiniń habarlaýynsha, Jol polıtsııasy basqarmasy jol-kólik oqıǵalarynyń sanyn azaıtý maqsatynda júrgizýshilermen jáne jaıaý júrginshilermen udaıy profılaktıkalyq jumystar júrgizedi. Statıstıkalyq málimetterge sáıkes, jazda jol apattarynyń sany artady, sebebi jol qozǵalysyna qatysýshylardyń basym bóligi Jol qozǵalysy erejeleriniń talaptary men jol belgilerin elemeı, ózderiniń jáne basqa da adamdardyń ómirlerine qater tóndiredi. Júrgizýshiler men jaıaý júrginshiler negizgi erejelerdi saqtaýy tıis. Tek sonda ǵana jol-kólik oqıǵalarynyń sany tómendeıtin bolady.
