Astanada táýligine orta eseppen 1200 tonna turmystyq qaldyq jınalady
ASTANA. KAZINFORM – Astana qalasynda qatty turmystyq qaldyqtardyń kólemi jyl saıyn artyp keledi. Bıylǵy jyldyń jeti aıynda resmı polıgonǵa 200 myń tonnadan astam qatty turmystyq qaldyq shyǵarylǵan. Bul týraly Astana qalasynyń Qorshaǵan ortany qorǵaý jáne tabıǵatty paıdalaný basqarmasy bastyǵynyń orynbasary Medet Djalpybaev málim etti.
Spıkerdiń aıtýynsha, elordada kún saıyn orta eseppen 1200 tonna turmystyq qaldyq jınalady.
– Kúnine orta eseppen 1200 tonna qaldyq shyǵarylady. Jınalǵan barlyq qoqystar suryptaý zaýytyna shyǵarylyp, qaıta óńdeýge jatpaıtyn qaldyqtar arnaıy kómý polıgonyna shyǵarylady. Qatty turmystyq kommýnaldyq qaldyqtardy jınaý men tasymaldaýda qalada 3 jeke menshik qoqys tasymaldaýshy uıym júzege asyrady, – dedi ol Astana qalasynyń kommýnıkatsııalar qyzmeti alańynda ótken brıfıngte.
Sondaı-aq Medet Djalpybaev qaldyqtardy basqarý júıesin jetildirý baǵytynda iske asyrylyp jatqan jobalarǵa toqtaldy.
– Sonymen qatar ol jobanyń negizgi maqsaty qaldyqtardy basqarýdyń zamanaýı júıesin engizý, ıaǵnı polıgonǵa kelgen qaıta óńdelmeıtin qaldyqtardy jaǵý arqyly elektr energııasyn óndirý. Budan bólek jeńildikpen nesıelendirý sheńberinde qalalyq ákimdik tarapynan qaldyqtardy óńdeý jáne suryptaý salasyndaǵy 6 ınvestıtsııalyq jobaǵa qoldaý kórsetildi. Onyń ishinde qatty turmystyq qaldyqtardy suryptaý zaýyty, plastık qaldyqtarynan buıymdar shyǵaratyn zaýyt, qaýipti qaldyqtardy joıý jáne óńdeý zaýyty, qaǵaz qaldyqtarynan sanıtarlyq-gıgıenalyq qaǵaz óndirý zaýyty, polıetılen qaldyqtarynan stretch-plenka shyǵarý zaýyty jáne taǵy basqa jobalar, – dep tolyqtyrdy ol.
Aıta keteıik, bıyl Astanada 122 zańsyz qoqys orny anyqtaldy.
