Astanada táýligine 35-40 bala qyzylshamen aýrýhanaǵa túsedi
ASTANA. KAZINFORM – Elordada 220 bala qyzylshaǵa qarsy em alýda, eki bala jansaqtaý bóliminde jatyr. Bul týraly Astana qalasy Qoǵamdyq densaýlyq saqtaý basqarmasy basshysynyń orynbasary Gúlnaz Dosmyrzaeva baıandady.
«Búgingi tańda balalar juqpaly aýrýlar emhanasynda 220 bala em qabyldaýda, onyń ekeýi jansaqtaý bóliminde jatyr. Jalpy tósek-orynnyń 44%-ynda naýqas bar. Táýligine balalar aýrýhanasyna 35-40 bala qyzylsha aýrýy dıagnozymen jatqyzylady. Al qalalyq emhanalarda 114 bala qyzylshadan ambýlatorııalyq em qabyldaýda», - dedi spıker Astana qalasynyń kommýnıkatsııalar qyzmetinde ótken brıfıngte.
Mamannyń aıtýynsha, bul aýrýdyń aldyn alýda vaktsına mańyzdy ról atqarady jáne qoǵamdyq densaýlyqqa aıtarlyqtaı áser etedi. Barlyq emhanalarda 6 aıdan 10 aı 29 kún jáne 2-4 jas aralyǵyndaǵy balalardy qyzylshaǵa qarsy qosymsha vaktsınalaý jalǵasýda.
«JRVI jáne qyzylsha aýrýlaryna medıtsınalyq kómek kórsetý úshin emhanalarda saǵat 8.00-den 20.00-ge deıin súzgi kabınetteri jumys isteıdi. Sondyqtan tek statsıonardyń qabyldaý bólmesine ǵana emes, tirkelgen jerińizdegi emhanaǵa da júgine alasyz. Vaktsınalaý kabınetteri jumys kúnderi saǵat 8.00-den 18.00-ge deıin, demalys kúnderi saǵat 9.00-den 18.00-ge deıin jazylýsyz jumys isteıdi. Naýqaspen baılanysqan jaǵdaıda tirkelgen emhanańyzda 72 saǵatta vaktsına ala alasyz», - dep túsindirdi Gúlnaz Dosmyrzaeva.
Aıta keteıik, elordada eresekter arasynda qyzylsha juqtyrý jaǵdaıy 49-dan 71 adamǵa deıin kóbeıdi. Al 1 jasqa deıingi jáne 3 jastaǵy balalar arasyndaǵy syrqattaný kerisinshe jeltoqsan aıymen salystyrǵanda tómendegen.
