Astanada táýligine 1000 patsıent qabyldaıtyn zamanaýı medıtsınalyq keshen ashý josparlanyp otyr
ASTANA. KAZINFORM - Astanada №2 kópbeıindi qalalyq aýrýhananyń bazasynda zamanaýı qabyldaý-dıagnostıkalyq kesheniniń qurylysy qazan aıynda aıaqtalady, dep habarlaıdy QR Densaýlyq saqtaý mınıstrliginiń baspasóz qyzmeti.
Qurylys barysymen jáne keshenniń medıtsınalyq jabdyqtarmen jaraqtandyrylýymen Densaýlyq saqtaý mınıstri Aqmaral Álnazarova tanysty.
Sapar barysynda ol qabyldaý bólimin, operatsııalyq jáne reanımatsııalyq palatalardy, dıagnostıkalyq kabınetterdi aralap kórip, dárigerlermen nysannyń patsıentterdi qabyldaýǵa daıyndyǵyn talqylady.
Táýligine 850-1000 patsıentke deıin qabyldaýǵa eseptelgen jańa nysan Memleket basshysynyń tapsyrmasyn oryndaý sheńberinde jergilikti bıýdjet qarajatynyń esebinen salynyp jatyr.
Jalpy aýmaǵy 7 myń sharshy metrden asatyn bes qabatty keshende zamanaýı dıagnostıkalyq qyzmetter, operatsııalyq bloktar, travmatologııa bólimsheleri jáne ınsýlt ortalyǵy biriktiriledi. Barlyǵy 118 tósek qarastyrylǵan, onyń ishinde 18-i reanımatsııalyq tósek.
Jańa keshenniń basty ereksheligi – shuǵyl medıtsınalyq kómekti patsıenttiń biryńǵaı marshrýty qaǵıdaty boıynsha kórsetý múmkindigi. ıAǵnı patsıentti qabyldaý men dıagnostıkadan bastap operatsııa jasaýǵa jáne odan keıingi emdeýge deıingi barlyq kezeń bir júıege biriktiriledi. Akýsherlik beıindegi patsıentter, jalpy patsıentter aǵyny jáne travmatologııalyq pýnktke kelýshiler úshin jeke kireberister kózdelgen.
Keshen bazasynda elordanyń sol jaǵalaýynda turatyn eresek turǵyndarǵa arnalǵan travmatologııalyq pýnkt te jumys isteıtin bolady. Ol táýligine 100-120 ótinish qabyldaýǵa eseptelgen.
Dıagnostıka men emdeý úshin kompıýterlik tomograf, qýaty 3 Tesla bolatyn MRT apparaty, angıograf, rentgen qondyrǵylary jáne ýltradybystyq zertteý apparattaryn qosa alǵanda, zamanaýı medıtsınalyq jabdyqtar satyp alyndy. Jańa operatsııalyq bloktar kúrdeli hırýrgııalyq aralasýlardy, onyń ishinde aýyr jaraqattar men qan tamyrlary aýrýlary kezinde operatsııalar júrgizýge múmkindik beredi.
Insýlt alǵan jáne aýyr jaraqattary bar patsıentterge medıtsınalyq kómek kórsetýge erekshe kóńil bólingen. Osy baǵyttardyń árqaısysy úshin 40 tósekten turatyn mamandandyrylǵan bólimsheler kózdelgen.
Sapar barysynda dárigerler mınıstrge zamanaýı hırýrgııalyq jabdyqtardy, sondaı-aq jańa týǵan nárestelerge shuǵyl medıtsınalyq kómek kórsetýge arnalǵan jańa neonataldyq ústelder men tasymaldaýǵa arnalǵan kıývezderdi tanystyrdy.
Aýrýhanada biryńǵaı tsıfrlyq monıtorıng júıesi de engizilýde. Ol dárigerlerge operatsııalyq jáne reanımatsııalyq bólimshelerdegi patsıentterdiń jaǵdaıyn ortalyqtandyrylǵan túrde baqylaýǵa múmkindik beredi.
Jańa keshende 150 jumys orny kózdelgen, onyń 50-i jańadan qurylatyn jumys oryndary.
-Qabyldaý-dıagnostıkalyq keshenniń ashylýy elordanyń medıtsınalyq ınfraqurylymyn damytýdaǵy mańyzdy kezeń bolyp, turǵyndardyń zamanaýı shuǵyl medıtsınalyq kómekke qoljetimdiligin keńeıtýge múmkindik beredi,-delingen habarlamada.
Osyǵan deıin Aqtóbede medıtsınaǵa 5,7 mlrd teńge bólindi: jańa jedel járdem stansasy salynatyny týraly jazdyq.
