Astanada Táýelsizdik kúnine oraı toǵyzqumalaqtan qalalyq týrnır ótti

ASTANA. KAZINFORM —  Astanada «Zań jáne tártip» qaǵıdaty aıasynda Qazaqstan Respýblıkasynyń Táýelsizdik kúnine oraı mektep oqýshylary, jasóspirimder, jastar men ardagerler arasynda toǵyzqumalaqtan qalalyq týrnır uıymdastyryldy.

BINOM School Ahmet Baıtursynuly atyndaǵy mektepte ótken týrnırge barlyǵy 200-ge jýyq adam qatysty.

— Men toǵyzqumalaq úıirmesin mektebimizde ashylǵan kúnnen bastap, ıaǵnı tórt jyldan beri júrgizip kelemin. Bul kúrdeli oıyn, bastapqyda esepteý qıyn bolýy múmkin. Degenmen onyń mańyzy óte zor, óıtkeni toǵyzqumalaq matematıkalyq qabiletterdi — esepteý, oılaý, logıkany damytady. Meniń shákirtterimniń matematıka páninen úlgerimi jaqsy. Balalar úlken qyzyǵýshylyqpen qatysady. Bul oıyn shahmattan kem túspeıdi: klassıka, blıts, rapıd sııaqty túrleri bar, bári ýaqytpen oınalady. Ár júristi aldyn ala 5-6 qadam ilgeri esepteý qajet. Eń bastysy — balalar paıdaly ispen aınalysady. Qazir kóp bala telefonǵa táýeldi. Áleýmettik jelide ýaqyt ótkizgenshe, toǵyzqumalaq oınap, ýaqytty tıimdi paıdalanǵany áldeqaıda paıdaly, — dedi dene shynyqtyrý pániniń muǵalimi Bolat Sadyqov.

Týrnır jeńimpazdary men júldegerlerine noýtbýk, planshet jáne smartfon sekildi baǵaly syılyqtar tabystaldy.

Aýqymdy is-sharany uıymdastyrýǵa muǵalimderge ata-analar, onyń ishinde mekteptiń Ákeler keńesi de belsendi túrde kómektesti.

— Bul oıyn balalarda tártip pen erejege baǵynýdy qalyptastyrady, sebebi olar oıynnyń naqty tártibin saqtaýy tıis. Sonymen qatar, tózimdilik pen zeıindilikti damytady. Toǵyzqumalaqtyń taǵy bir ereksheligi — tasty jaı kóterýge bolmaıdy: kóterseń, mindetti túrde júris jasaý qajet. Bul degenimiz — bala ár qadamyn oılanyp, barlyq múmkin nusqany eseptep baryp sheshim qabyldaıdy. Ómirde de olar kez kelgen áreketten buryn saldaryn oılaýdy úırenedi. Osylaısha jaýapkershilik qalyptasady. Bul tynysh, zııatkerlik oıyn, ol balanyń úılesimdi damýyna yqpal etedi, — dedi BINOM School Ahmet Baıtursynuly atyndaǵy mektep-lıtseıdiń Ákeler keńesiniń tóraǵasy Ernat Rahmetolla. 

Aıta ketelik Astanadaǵy respýblıkalyq jármeńkege 100-ge jýyq qolónershi kelgeni týraly jazǵan edik.