Astanada Táýelsizdik kúnine arnalǵan kórme uıymdastyryldy
Astanada «Han Shatyr» oıyn-saýyq ortalyǵynda «Shahar shejiresi» atty kórme uıymdastyryldy. Ol Táýelsizdik kúni men Astana qalasynyń 25 jyldyǵyna arnaldy, dep habarlaıdy Kazinform elorda ákimdiginiń resmı saıtyna silteme jasap.
Kórmege qalalyq memlekettik arhıvte saqtalǵan elorda tarıhy týraly qujattar men fotosýretter qoıyldy.
«Halqymyzdyń baı tarıhyn endi jastar jalǵastyrýy kerek. Qalamyzda qanshama qazaq mektepteri ashylyp jatyr. Kezinde soǵystyń aldynda 5-6 qazaq mektebi boldy, tyń ıgerý kezinde jalǵyz qazaq mektep-ınternaty qaldy. Qazir qalamyz joǵary qarqynmen ósip jatyr. Buryn turǵyndardyń 70-80 paıyzy qazaq bolsa, tyń ıgerý kezinde 10 paıyzǵa deıin túsip qaldy. Búginde bas qalamyzdaǵy jergilikti ulttyń úlesi 90 paıyzǵa jetti. Qala turǵyndary 200 myńnan bastap 1,5 mln ósti», - dedi kórmeniń ashylýynda sóz sóılegen Marat Ábsámetov.
Jınalǵan kópshilik aldynda sóz sóılegen ǵalym qazaqstandyqtardy Táýelsizdik kúnimen quttyqtady.
«Han Shatyr» oıyn-saýyq ortalyǵyndaǵy osyndaı mańyzy bar kórme 3 kún boıy qala turǵyndaryna esigin aıqara ashpaq. Olardy arhıv qyzmetshileri kórmege qoıylǵan qundy derektermen tanystyratyn bolady.
Kórmeniń ashylýyna qalalyq arhıv basshysynyń orynbasary Tóleýǵalı Qyshqashbaev, ózge de tarıhshy ǵalymdar, qala turǵyndary qatysty.
