Astanada Táýelsizdik kúnine oraılastyrylǵan «BІZDІŃ EL OSYNDAI!» aqyndar aıtysy ótedi
ASTANA. 7 jeltoqsan. QazAqparat - Qazaqstan Respýblıkasy Mádenıet jáne aqparat mınıstrligi 9 jeltoqsanda Astana qalasy Kongress holl kontsert zalynda Táýelsizdik kúnine oraılastyrylǵan «BІZDІŃ EL OSYNDAI!» respýblıkalyq aıtysty ótkizedi.
Atalǵan vedomsto baspasóz qyzmetiniń málimetinshe, aıtystyń negizgi maqsaty - aıtys ónerin tól mádenıetimizdiń baǵa jetpes asyl murasy retinde halyqqa keńinen nasıhattaý. Óskeleń urpaq sanasyna ata babalarymyz san ǵasyrdan beri ańsap jetken Táýelsizdiktiń taǵylymyn uıalatý. Halyq arasynan shyqqan jas aıtysker aqyndarǵa demeý kórsetip olarǵa BAQ arqyly jarnama jasaý.
Aıtystyń ereksheligi - aıtysqa aımaqtyq aqyndar aıtysynda suryptalyp, top jarǵan jeńimpazdar ǵana qatysady. Aqtyq aıtysqa joldama alǵandardyń negizi jastar, olar halyqqa keńinen tanymal: Sara Toqtamysova, Jandarbek Bulǵaqov, Muhtar Nııazov, Ásem Erejeqyzy, Balǵynbek Imashev, Meıirbek Sultanhandar ózara saıysqa túsedi.
Bas báıgege «Altyn dombyra» tigilip otyr.
Aıtystyń qazylar alqasy quramynda Halyq aqyndary Ásııa Berkenova, Áselhan Qalybekova, aıtysker aqyn Esenqul Jaqypbekov, folklortanýshy-ǵalym Serik Negımov jáne Qazaqstannyń eńbek sińirgen qaıratkeri, aqyn Júrsin Erman bar.
