Astanada Táýelsizdik kúnine oraı muqtaj jandarǵa azyq-túlik sebeti taratyldy

ASTANA. QazAqparat – Elordada 1 myńǵa jýyq muqtaj janǵa azyq-túlik sebeti taratyldy, dep habarlaıdy QazAqparat tilshisi.

«Táýelsizdik kúnine oraı elordada túrli baǵyttaǵy 50-ge jýyq shara ótedi. Іs-sharalardy qala ákimdiginen bólek, úkimettik emes uıymdarda da ótkizip jatyr. Sharalardyń formaty da ártúrli. Keshe 1 myńǵa jýyq muqtaj janǵa azyq-túlik sebetin tarattyq. Onyń ishinde áleýmettik osal topqa jatatyn otbasylar da bar», - dedi Astana qalasy ákimdiginiń jastar saıasaty basqarmasynyń bólim basshysy Aıan Ermentaev.

Sondaı-aq, ákimdik ókili Táýelsizdik merekesimen quttyqtaı kele, astanalyqtarǵa úndeý joldady.

«Memlekettik tý – táýelsizdiktiń sımvoly. Osy oraıda mereke kúni elorda jurtyn úıdiń terezesine nemese balkonǵa tý ilip qoıý dástúrin qoldaýǵa shaqyramyn», - deıdi ol.

Aıta ketsek, búgin elordada Táýelsizdik kúnine oraı avtosherý ótti.

Atalǵan sharaǵa memlekettik tý taǵylǵan 30-dan astam jeńil kólik qatysty.

Avtosherý qatysýshylary memlekettik rámizder alańynan bastap «Otan qorǵaýshylar» monýmentine deıin 31 shaqyrym júrip ótti.