Astanada «Táýelsiz Qazaqstan tarıhyn zertteý máseleleri» taqyrybynda dóńgelek ústel ótedi
ASTANA. 3 qazan. QazAqparat - Erteń Astanada «Táýelsiz Qazaqstan tarıhyn zertteý máseleleri» atty dóńgelek ústel ótkiziledi.
Bul týraly QR Bilim jáne ǵylym mınıstrliginiń baspasóz qyzmeti habarlady.
Іs-sharaǵa Qazaqstan Respýblıkasy Bilim jáne ǵylym mınıstrliginiń ókilderi, ǵalym-tarıhshylar, JOO oqytýshylary men kolledj jáne mektep muǵalimderi, Qazaqstan Respýblıkasy Ulttyq akademııalyq kitaphanasy men QR Ulttyq muraǵat mekemesiniń qyzmetkerleri qatysady.
Dóńgelek ústel jıynynda orta mektepterde, orta arnaýly jáne joǵary oqý oryndarynda tarıh páninen bilim berýdi jańartýdaǵy qazirgi Qazaqstan tarıhynyń ózekti máseleleri, oqýlyqtyń mazmuny men pishini talqylanady.
Dóńgelek ústeldiń moderatory - Memleket tarıhy ınstıtýtynyń dırektory, tarıh ǵylymdarynyń doktory, professor Búrkitbaı Aıaǵan. Oǵan Qazaqstannyń kórnekti ǵalym-tarıhshylary, oqý oryndarynyń oqytýshylary: L.N. Gýmılev atyndaǵy Eýrazııa ulttyq ýnıversıtetiniń oqytýshysy, t.ǵ.d., professor Zııabek Qabyldınov, L.N. Gýmılev atyndaǵy Eýrazııa ulttyq ýnıversıtetiniń oqytýshysy, f.ǵ.k., professor Kúlzıra Ysqaqova, QR BǴM ǴK «Memleket tarıhy ınstıtýty» MM Derektaný, tarıhnama jáne Otan tarıhy bóliminiń bas ǵylymı qyzmetkeri, t.ǵ.d., professor Zadash Dúkenbaeva jáne t.b. qatysady.
