Astanada Tatarstan Respýblıkasy óner sheberleriniń gala kontserti ótti
«Qazaqtar men tatarlardyń baýyrlastyǵy tamyry tereńge ketken qart tarıhpen astasyp jatyr. Ortaq tegimiz, dinimiz, salt-dástúrimiz, týysqan tilimiz bizdiń halyqtardy máńgilikke biriktirgen. Astanada ótip jatqan Tatarstan Respýblıkasynyń mádenıet kúnderi bolashaq ózara tıimdi jáne jemisti qarym-qatynastyń negizin bekite túserlik san ǵasyrlyq dostyq pen aǵaıyndyqtyń taǵy bir dáleli bolǵandaı», - dedi kontserttiń ashylý saltanatynda sóz sóılegen Astana qalasynyń ákimi Imanǵalı Tasmaǵambetov. Tatarstan Respýblıkasynyń prezıdenti Rústem Mınnıhanov Qazaqstandaǵy Tatarstannyń mádenıet kúnderi eki eldiń odan saıyn jaqyndasýyna kóp áserin tıgizetinin basa aıtty. «Bizdiń dinimiz de, tilimiz de bir. Endi keleshegimiz de bir bolady dep oılaımyn. Osynsha ystyq yqylaspen, keń peıilmen qarsy alyp otyrǵan Qazaqstan halqyna, Elbasy Nursultan Nazarbaevqa, Astana ákimi Imanǵalı Tasmaǵambetovke alǵysymyz sheksiz», - dep atap ótti ol. Aıta keteıik, kontsert barysynda Tatarstannyń belgili óner maıtalmandary Artýr Mıngazov, Marat Galımov, Regına Valıeva, «Qazan» bı ansambli, Musa Jálel atyndaǵy TMAOBT jáne basqa da kóptegen ártister men ujymdar óz ónerlerin kórsetti.
