Astanada «Tarıhy tereń Aq Jaıyq» kórmesi ashylady

Bul týraly Ulttyq mýzeıdiń baspasóz qyzmeti habarlady.

Kórme Batys Qazaqstan oblystyq mýzeı qorlary arqyly elorda turǵyndary men qonaqtaryna Aq Jaıyq óńiriniń materıaldyq jáne rýhanı mádenıetiniń baǵa jetpes qundylyqtaryn kórsetýdi jáne ólke tarıhymen tereńirek tanystyrýdy kózdeıdi.

Kórmege arheologııalyq qazba jumystary kezinde tabylǵan úshburysh, shyrsha, romb órnekti qysh, shyǵyr qumyralar, Jaıyq qalashyǵynyń ornynan tabylǵan kesene qaldyqtary jáne kirpish tastar qoıylady. Sonymen qatar ekspozıtsııalardyń qatarynda b.d.d VІ-V ǵasyrlarǵa tıesili Taqsaı oba-kesheninen 2012 jyly (BQO Terekti aýdany, Dolınnoe eldi-mekeni) tabylǵan «Altyn hanshaıymnyń» jańǵyrtylǵan nusqasy, ejelgi sarmat kezeńine jatatyn aqsúıek áıel jerlengen jerdiń órtengen aǵash bóreneleri, ǵuryptyq ydystar bolady.

Buǵan qosa kópshilikke 1969 jyly Santas jonyndaǵy obalardan tabylǵan qypshaq jaýyngeriniń múrdesi, qypshaq jaýyngeriniń qarý-jaraqtary, E.Pýgachev búligin basýǵa qatysýshylarǵa 1775 jyly orys patshaıymy ІІ Ekaterına syı retinde bergen qolǵap, orys aqyny A. Pýshkın kıgen kıimniń kóshirmesi usynylady.

Jınalǵan jurtqa Kishi júzdiń sońǵy hany Jáńgir han men Fatıma hanym kıgen kıimderdiń kóshirmelerin, A.N.Harýzınniń 1891 jyly jaryq kórgen «Kırgızy Býkeevskoı Ordy» atty kitabyn, sonymen qatar, Batys Alashorda men Uly Otan soǵysy kezeńindegi muraǵattyq qujattardy kórý múmkindigi beriledi.

Kópshilik kúıshi-kompozıtor Dına Nurpeıisovanyń qamzolyn, kúıshi Q.Jantileýovtyń shapany men dombyrasyn, Aq Jaıyqty meken etetin ózge ult ókilderiniń ulttyq kıimderi men mýzykalyq aspaptaryn, Á. Qasteevtiń 1941 jyly salǵan «Qyz Jibek pen Tólegenniń kezdesýi» atty grafıkasyn jáne qazaq arýlary qoldanǵan zergerlik buıymdardy tamashalaıdy.

Kórmeni Batys Qazaqstan oblystyq ákimdiginiń qoldaýymen QR Ulttyq mýzeıi, Batys Qazaqstan oblysynyń mádenıet, muraǵattar jáne qujattama basqarmasy men oblystyq tarıhı-ólketaný mýzeıi uıymdastyrdy.

Kórme 2015 jylǵy 18 qarashadan 2016 jylǵy 18 qańtarǵa deıin jalǵasady.