Astanada «Tarıhy tereń Aq Jaıyq» atty kórme ashyldy (FOTO)
ASTANA. QazAqparat - Búgin Qazaqstan Respýblıkasynyń Ulttyq mýzeıinde "Ǵasyrlar qoınaýynan syr shertken Qazaqstan" jobasynyń aıasynda Batys Qazaqstan oblystyq tarıhı-ólketaný mýzeıiniń "Tarıhy tereń Aq Jaıyq" atty kórmesi ashyldy. Kórmeni asha otyryp, kelýshilerdi qarsy alǵan mýzeı dırektory Darhar Myńbaı buǵan deıin Qaraǵandy, Pavlodar, Atyraý oblystarynyń mýzeıleri elordada óz kórmelerin ótkizkenin jetkizdi.
"Buǵan deıin biz Qaraǵandy, Pavlodar, Atyraý oblystarynyń mýzeıleriniń eksponattarynan osyndaı kórme ótkizdik. Bul jumystar "Ǵasyrlar qoınaýynan syr shertken Qazaqstan" degen joba aıasynda jasalyp jatyr. Jalpy, bul jobanyń maqsaty ne degen suraqqa jaýap bersek, mundaı kórmeler Qazaqstandy aldymen ózimiz taný úshin, Qazaqstannyń túkpir-túkpirine deıin tanyp bilýimiz úshin kerek. Mine, sonda ǵana biz qazaqty əlemge tanyta alamyz. Jalpy, ózderińiz bilesizder, Batys Qazaqstan oblysy shyn məninde tarıhy tereń, qazynaly óńir. On jyl ishinde osy óńirde alty myńnan asa qorǵandar men eski qalalar tabylǵan eken. Onyń barlyǵy bolashaqtyń enshisinde", - deıdi D.Myńbaı.
Jalpy, kórmege Jaıyq qalashyǵynyń ornynan tabylǵan kesene qaldyqtary jəne kirpish tastar, shyǵyr qumyralar qoıylǵan. Sondaı-aq, 2012 jyly Taqsaı oba-kesheninen tabylǵan "Altyn hanshaıymnyń" jańartylǵan nusqasy, ejelgi sarmat kezeńine jatatyn aqsúıek əıel jerlengen jerdiń órtengen aǵash bóreneleri, ǵuryptyq ydystar qoıylǵan. Eksponattar arasynda 1969 jyly Santas jonyndaǵy obalardan tabylǵan qypshaq jaýyngeriniń múrdesi, qypshaq jaýyngeriniń qarý-jaraǵy, E.Pýgachev búligin basýǵa qatysqan adamdarǵa orys patshaıymy ІІ Ekaterına syıǵa bergen qolǵap, orys aqyny A.Pýshkın kıgen kıimniń kóshirmesi bar.
