Astanada tarıhı-mádenı eskertkishter jalǵa berilmek

ASTANA. KAZINFORM — Elordada jergilikti mańyzy bar tarıhı-mádenı eskertkishterdi jalǵa alyp paıdalanýǵa ruqsat beriledi. 

Atalǵan másele búgin qalalyq máslıhattyń kezekten tys sessııasynda talqylandy.

— Sizderdiń nazaryńyzǵa Astana qalasynyń aýmaǵynda ornalasqan tarıhı-mádenı eskertkishterdi jalǵa berý aqysyn belgileý týraly sheshim jobasy usynylady. Atalǵan bastama Premer-mınıstrdiń 2025 jylǵy 13 tamyzdaǵy ókimimen uıǵarylǵan jáne 2025 jylǵy 17 shildedegi Qazaqstan Respýblıkasynyń keıbir zańnamalyq aktilerine, Astana jáne respýblıkalyq qalalarda ulttyq jobalardy damytý, kásipkerlik jáne memlekettik organdardyń máseleleri boıynsha ózgerister men tolyqtyrý engizý týraly zańyna negizdelgen, — dedi Astana qalasynyń mádenıet basqarmasynyń basshysy Jańabaı Meıirmanqulov máslıhat otyrysynda.

Basqarma basshysynyń málimetinshe, búginde elordada jergilikti mańyzy bar 43 tarıhı-mádenı eskertkish bar, onyń 26-y qala qurylysy jáne sáýlet eskertkishi, 7 monýmenttik eskertkish. Olardyń qatarynda Oktıabr kınoteatry, Beıbitshilik jáne kelisim saraıy, bas meshit, Kenesary eskertkishi, S. Seıfýllın eskertkishi taǵy basqa.

— Jalǵa alý quny ár eskertkishtiń túri boıynsha bir sharshy metri bir aılyq eseptik kórsetkishpen esepteledi, — deıdi ol.

Osy oraıda máslıhat depýtattary Mádenıet basqarmasynyń basshysyna eskertkishterdi jalǵa berýdiń qalaǵa qandaı paıdasy bar degen saýal qoıdy.

— Jeke menshik uıymdar, mekemeler eskertkish mańynda is-shara ótkizetin bolsa, olar memleketke salyq tóleıdi. Biraq, bul jańashyldyqtyń memlekettik mekemelerge qatysy joq, memlekettik mekemeler bizdiń ǵımarattarda is-sharalar ótkizip júr. Bul jeke uıym, mekemege qoıylatyn talaptar, — dep jaýap berdi Jańabaı Meıirmanqulov.

Daýysqa salý nátıjesinde máslıhat depýtattary atalǵan bastamany biraýyzdan qoldady.

Eske sala ketsek, jyl basynda kitaphanalarda aqyly is-shara ótkizip, tabys tabýǵa ruqsat beriletini týraly jazǵan edik.