Astanada «Tarıhı Atajurt» qoǵamdyq birlestigi óz jumysyn bastady
«Elbasynyń «Máńgilik El» ıdeıasy, «Nurly jol» baǵdarlamasy, «Bolashaqqa baǵdar: rýhanı jańǵyrý» maqalasynyń baǵyttaryn iske asyrý jáne shettegi qandastarymyzdyń elge kelip eńbek etýine múmkindik jasaý maqsatynda qurylǵan birlestiktiń alda atqarar jumystary kóp», - deıdi «Tarıhı Atajurt» qoǵamdyq birlestiginiń Basqarma tóraǵasy Ǵalym Pernebaev.
Atalǵan qoǵamdyq birlestik Qazaqstan táýelsizdigin alǵan alǵashqy sátte alystaǵy aǵaıyndarǵa hat joldap, jat eldegi qandastaryn qanatynyń astyna alyp, tarıhı erlik jasaǵan Elbasymyz Nursultan Ábishuly Nazarbaevtyń senimin aqtaý arqyly qazaq halqyna qaltqysyz eńbek etýdi kózdeıdi.
«Tarıhı Atajurt» birlestigi jáne osy uıymnyń qyzmetterin kórsetý maqsatynda ashylǵan jańa saıt («https://atazhurt2050.kz» - avt.) syrttaǵy qazaqtardyń elge oralyp, shańyraq kóterip jalpy Qazaq eliniń órkendeýine qomaqty úles qosýy úshin aýqymdy sharalardy josparlaýda.
«Biz eń áýeli atazhurt2050.kz aqparattyq-tanymdyq portal arqyly álem qazaqtarynyń ádebıeti men mádenıetin nasıhattap, tutas qazaq ıdeıasyn qalyptastyrýǵa, onyń bir ǵana Otan - Qazaqstanǵa toptasýyna óz úlesimizdi qospaqpyz. Joǵaryda atalǵan portal «Jańalyqtar», «Ádebıet arnasy» «Tarıh qorjyny», «Syr-suhbat», «Kóshi-qon», «Aqjoltaı» atty aıdarlarymen tyń da derekti materıaldar jarııalap, óz oqyrmandaryn qalyptastyratyn bolady», - deıdi «Tarıhı Atajurt» qoǵamdyq birlestigi dırektorynyń orynbasary jazýshy Jádı Shákenuly.
