Astanada Taras Shevchenko eskertkishiniń jobasy bekitildi
ASTANA. QazAqparat - Astana qalasynyń Sáýlet jáne qala qurylysy basqarmasy ýkraın aqyny Taras Shevchenkoǵa arnalǵan eskertkishtiń jobasyn bekitti. Bul týraly Astanadaǵy L.N. Gýmılev atyndaǵy EUÝ-da ýkraın aqyny Taras Shevchenkonyń 204 jyldyǵyna oraı dóńgelek ústel otyrysy aıasynda Ýkraına elshiligi janyndaǵy qoǵamdyq keńestiń teń tóraǵasy Vladımır Skrytnık málim etti, dep habarlaıdy QazAqparat tilshisi.
«Ýkraındyq sýretshiler alqasy jobany daıarlap qoıdy. Eskertkish nusqasy osynda qorǵalyp, qabyldandy. Onda tutas kompozıtsııa qamtylǵan, dál ortasynda Taras Shevchenkonyń esketkishi ornalasady. Sonymen qatar, sol jaǵynda ýkraındyq eki tulǵanyń, al oń jaǵynda qazaqtyń eki tulǵasynyń beınesi qoıylady», - dep atap ótti V. Skrytnık.
Osy oraıda bul kompozıtsııa bekitilip, eskertkish ornatylatyn oryn belgilendi. Endi qarjylandyrý máseleleri pysyqtalýda.
Taras Shevchenkoǵa arnalǵan eskertkish L.N. Gýmılev atyndaǵy EUÝ mańynda qoıylady. Monýmenttiń bıiktigi 3,8 metr bolmaq.
Aıta keteıik, budan buryn Kıevte qazaq aqyny Jambyl Jumabaevqa eskertkish ornatylǵan edi. 
