Astanada tapshy mamandyqtar anyqtaldy
ASTANA. QazAqparat - Astanadaǵy tapshy mamandyqtardy anyqtaý úshin arnaıy ortalyq monıtorıng júrgizedi. Qazirgi kezde eńbek naryǵynda tehnıkalyq jáne qurylys mamandaryna suranys joǵary, dep habarlady «Astana aqshamy» gazeti.
Atap aıtqanda, ónerkásiptiń túrli salalaryndaǵy ınjenerler, sonyń ishinde ınjener-mehanık, ınjener-jobalaýshy, ınjener-energetık, daıashylar, aspaz, montajdaýshylar, elektr mamany, elektromontajdaýshy-retteýshi, gazelektrdánekerleýshiler, santehnıkter, temir ustalary, qyrnaýshylar jetispeıdi. Jyl basynan beri Astana qalasynyń Jumyspen qamtý ortalyǵyna jumys izdep 3 536 adam júginse, olardyń 55%-y - 29-ǵa deıingi jastar.
Bıyl qyrkúıek aıynda 97 adam on aılyq kásibı daıarlaý kýrsyna oqýǵa jiberildi. Mamandar Astana qalasy ákimdiginiń Energetıka jáne baılanys, Danalyq jáne Basqarý kolledjderinde daıarlandy. 164 adam gaz-elektr dánekerleýshi, tiginshi-úlgishi, tárbıeleýshi, elektr mamany, satýshy-kassır, aspaz mamandyqtaryn jańadan meńgerdi.
Kásibı mashyqtaryn arttyrǵysy keletinderge arnalǵan býhgalter, qoıma meńgerýshisi, medbıke, tárbıeshi, aǵylshyn tili, ymmen sóıleý aýdarmashysy, aspaly kran mashınısi kýrstary bar.
«Jumyspen qamtý jol kartasy - 2020» baǵdarlamasy aıasynda jastarǵa laıyqty jumys oryndaryn usynýdan basqa, 6 aılyq jastar praktıkasyna qatysý múmkindigi beriledi.
