Astanada tanymal tis dárigeriniń fotokórmesi ótip jatyr
ASTANA. 28 shilde. QazAqparat - Qazirgi zaman murajaıynda Reseı fotosýretshiler odaǵynyń múshesi, tanymal tis dárigeri - dantıst Kýprııanov Genrıhtiń «Sostoıanıe-6» fotokórmesi ótedi. Bul týraly astana.kz saıtyna kórmeni uıymdastyrýshylar habarlady.
Kórmege elordamyz Astana men Aqmola oblysynyń ómirindegi sátter beınelengen sheberdiń 43 jańa týyndysy qoıyldy. Ekspozıtsııaǵa ár alýan peızajdar, portretter men natıýrmorttar engen.
«Qalalyq peızajdar» serııasynda kórermender nazaryna 19 fotosýret usynylǵan.
Kýprııanov Genrıh 1963 jyly Qazan memlekettik medıtsınalyq ınstıtýtyn támamdaǵan jáne 1964 jyly qazan aıynda KSRO kommýnıstik partııasynyń shaqyrýymen Tselınograd qalasyna kelgen. Sodan beri elordada turady. Astanalyq Densaýlyq úıinde 47 jyl boıy tis dárigeri-dantıst bolyp eńbek etýde. Ár jyldary akvarelmen peızajdar salyp, tastar men fotoýretterge áýes bolǵan. Súıikti jumysy men fotosýretter ómirlik senimine aınalǵan. 1966 jyldan beri aq-qara tústi fotosýrettermen aınalysa bastady. 1968 jyly «Sáýle» jáne «Іzdeý» fotoklýbtarynda bilim alǵan. Derekti jáne kórkem fotosýretterdiń qalalyq, oblystyq, respýblıkalyq, búkilodaqtyq jáne halyqaralyq kórmelerine qatysqan. «Tselınogradskaıa pravda» oblystyq basylymynda jáne «Izvestııa» búkilodaqtyq gazetinde fotokonkýrstarda birneshe ret laýreat atanǵan. 1979 jyly Bolgarııada Keńes Odaǵynyń Halyqaralyq kórkemóner shyǵarmashylyǵy festıvali aıasynda ótken fotokórmeniń qatysýshysy bolyp tabylady. Óziniń eńbekteri úshin halyq shyǵarmashylyǵynyń túrli dıplomdarymen, «Sıbır-2006» halyqaralyq fotosalony júldesimen jáne t.b. marapattalǵan. Onyń týyndylary Qazaqstan, Reseı, Germanııa, Japonııa jáne álemniń ózge de elderinde kórmelerge qoıylǵan.
Genrıh Kýprııanovtyń «Sostoıanıe - 6» fotokórmesi 31 shildege deıin ótedi.
