Astanada tanymal metsenat S. Ysqaqovtyń «Dúnıe dıdary jıhangezdiń kózimen» fotokórmesi ashyldy

«Osy kórmeni uıymdastyrýdaǵy basty maqsatym álemdegi túrli halyqtar týraly, olardyń mádenıetteri, tarıhy, qalalary, óńirleri, ómir salty jaıly ózimizdiń elordalyqtarǵa tanystyrý. Men 100-den astam elde boldym. Sondaǵy sezingen, kórgenimdi jalpaq jurtqa jetkizgim keldi»,-deıdi S.Ysqaqov.

Jıhankez atalmysh kórmeni Qazaqstan Táýelsizdiginiń 20 jyldyǵyna arnap otyr. Kórmege jalpy sany 113 fotosýret usynylǵan.

Aıta keteıik, ol jer sharynyń 6 qurlyǵynyń 100-den astam elin aralap, Antarktıda men Arktıkaǵa tabany tıgen alǵashqy qazaqtardyń biri. S.Ysqaqov 2007 jyly Ońtústik polıýsten shamamen 100 shaqyrym jerde ornalasqan «Amýndsen-Skott» amerıkandyq stansysynda bolyp, onda Qazaqstan men «Nur Otan» partııasynyń týlaryn ornatqan bolatyn. Al 2008 jyly Jerdiń eń Soltústik núktesinde Qazaqstan týyn jelbiretken edi. Sondaı-aq Gımalaı taýynda bolyp, Han-Táńiri shyńyna kóterilgen. S.Ysqaqovtyń «Tilep», Ál-Farabı jáne Sultan Beıbarys atyndaǵy qoǵamdyq qaıyrymdylyq qorlary jumys isteıdi.

S. Ysqaqov «Halyqaralyq týrızm jáne sport akademııasynyń» jáne «Halyqaralyq metsenattyq akademııasynyń» akademıgi, «Qurmet» (Qazaqstan), «Derjava» (RF), «Rýbınovyı krest» (RF), «Patshaıym Vıktorııa» atyndaǵy (Ulybrıtanııa) ordenderdiń kavaleri, QR Prezıdentiniń qurmet dıplomynyń jáne «Altyn medal» (Shveıtsarııa) nagradasynyń ıegeri.

Onyń aty Reseıde de tanymal. 2007 jyly ol Reseıde «Jyl metsenaty» atanyp, «Ulttyń altyn qory» tizimine engizilgen.