Astanada tanymal ıtalııalyq mýzykanttar óner kórsetedi
ASTANA. QazAqparat - Tanymal ıtalııalyq mýzykanttar - Stefano Andreatta (pıanıst) men Eddı de Nadaı (dırıjer) 24 maýsym kúni «Astana Operanyń» Úlken zalynda «Italıandyq klassıka» kontsertin usynady. Kontsertke «Astana Operanyń» sımfonııalyq orkestri qatysady, dep habarlaıdy teatrdyń baspasóz qyzmeti .
Baǵdarlamada ataqty kompozıtorlardyń shyǵarmalary oryndalady: Dj. Rossınıdiń «Ala qanat saýysqan» operasyna ývertıýra, F.Lısttiń Fortepıano men orkestrge arnalǵan №2 lıa major kontserti, sonymen qatar Dj.Verdıdiń «Taǵdyr kúshi» men «Jyl mezgilderi» operasyna ývertıýra («Sıtsılııa keshkiligi» operasynan engizilgen nómirler).
Agostıno Steffanı atyndaǵy Konservatorııa túlegi, Gýstavo Romero, Rıkkardo Rısalıtı syndy tanymal ártisterdiń sheberlik sabaqtarynyń qatysýshysy, talantty pıanıst Stefano Andreatta úshin «Astana Opera» sahnasynda alǵashqy óner kórsetý bolsa, al belgili ıtalıandyq dırıjer Eddı de Nadaı úshin «Astana Operanyń» sımfonııalyq orkestrimen ekinshi ret jumys jasap otyr.
- «Astana Opera» teatrynyń sımfonııalyq orkestri - sózsiz keremet, erekshe súıispenshilikpen qaıta jumys jasaýǵa bara jatyrmyn. Men onyń ıkemdiligin, ásirese operalyq repertýardaǵy dybystalý ásemdigin baǵaladym. Sebebi ony oryndaý ońaıǵa túspesi anyq. Stefano Andreattany birneshe jyl tanımyn, biraq bir sahnada jumys jasap kórmegenbiz. Ol joǵary deńgeıli mýzykant, Italııada mártebeli bolyp tabylatyn FVG 2016 Halyqaralyq pıanıster konkýrsynyń jeńimpazy. Stefano Andreattanyń oryndaýyndaǵy solısten asqan sheberlikti talap etetin opýs (bir kompozıtordyń shyǵarmalarynyń ishindegi bólek nómirdegi túri) - Lısttiń №2 fortepıano men orkestrge arnalǵan kontsertine dırıjerlik etý - men úshin súısinerlik jaıt, - dep bólisti Eddı de Nadaı. - I.Brams pen Dj.Verdı meniń súıikti kompozıtorlarym. Osy kontserttiń baǵdarlamasynda tek ekinshi uly ıtalıandyq kompozıtor bar, ol Dj. Rossınımen qatar ıtalıandyq mýzykanyń naǵyz tuǵyry. Qazaqstandyq kórermen qaýym osy kontsertten keremet lázzat alady dep senim bildiremin.
Aıta keterligi, Eddı de Nadaı - ıtalıandyq dırıjer ári pıanınoshy. Uzaq ýaqyt boıy Italııanyń túrli teatrlarynda ustaz-kontsertmeıster jáne rejısserdiń kómekshisi bolyp jumys jasaǵan. 2003 jyly Pech qalasyndaǵy (Vengrııa) Vengr sımfonııalyq orkestrimen dırıjer retinde alǵash ret sahnaǵa shyqqan. 2004 jyly Izmır qalasynda (Túrkııa) Dj.Rossınıdiń «Sevıl shashtarazy», V.Bellınıdiń «Norma», DJ.Verdıdiń «Rıgoletto» operasynyń qoıylymdaryna qatysqan. Sol ýaqyttan beri álemniń túrli elderinde kóptegen operalyq qoıylymdar men operalyq-sımfonııalyq baǵdarlamalarǵa dırıjerlik etken.
Stefano Andreatta - Italııa, Ispanııa, AQSh jáne taǵy basqa elderdegi kóptegen halyqaralyq pıanıster konkýrsynyń laýreaty ári júldegeri. 2007 jyldan bastap Veneto qalasyndaǵy fılarmonııa orkestrimen, «Nova Amadeýs» kameralyq orkestri jáne taǵy basqalarmen birge solıst retinde óner kórsetken. Qazirgi ýaqytta Italııada jáne shetelde kameralyq mýzykanyń oryndaýshysy jáne solıst retinde kontsertter berip júr.
