Astanada tanymal ázirbaıjan jazýshysy Shyńǵys Abdýllaev shyǵarmashylyq kesh ótkizdi
ASTANA. 16 maýsym. QazAqparat - Búgin elorda jurty Astanadaǵy UR Ulttyq akademııalyq kitaphanasynda Ázirbaıjan halyq jazýshysy Shyńǵys Abdýllaevpen shyǵarmashylyq kezdesý ótkizdi.
Sh. Abdýllaev Astanaǵa TMD elderiniń «Jańa álemdegi Eýrazııalyq mádenıet» forýmyna qatysý úshin kelgen bolatyn.
Shyńǵys Abdýllaev 1959 jyly Bakýde dúnıege kelgen. Úsh joǵary bilimi bar jazýshy ázirbaıjan men orys tilinen bólek, aǵylshyn, ıtalıan, túrik jáne parsy tilderin jetik biledi. Jastaıynan bokspen aınalysqan, qarýdyń barlyq túrlerin ıgergen ol kezinde shetelderde Qorǵanys mınıstrliginiń arnaıy tapsyrmalaryn oryndady. Erekshe maqsattaǵy arnaıy bólimdi basqardy. Belgııada, Germanııada, Polshada, Rýmynııada, Angolada, Aýǵanstanda qyzmet atqardy. Otstavkadaǵy maıor, birqatar úkimettik nagradalardyń ıegeri. Zań ǵylymdarynyń doktory.
Birde ol esh qatysy joq bolsa da 1986 jyly Chaýsheskýge jasalǵan qastandyqqa qatysy bar degen kúdikpen Rýmynııadan alastatyldy. Sebebi ol oqıǵany búge-shigesine deıin óz romanyna qosqan bolatyn. Namıbııada ol tutqyndalǵan Angola komandırlerin bosatý operatsııasyna qatysty. Ol operatsııadan tek tórt adam ǵana tiri kelgen bolatyn.
«Golýbye angely» atty eń alǵashqy romany KGB arhıvinde úsh jyl jatty. Romanǵa tyıym saldy, óıtkeni onda asa qupııa málimetterdiń bary anyqtaldy. Keıin 1988 jyly jaryqqa shyqqanymen birneshe redaktsııalyq túzetýlerge ushyrady.
Shyńǵys Abdýllaevtyń ádebı eńbekqorlyǵy jaıynda kóp aıtylyp júr. Shynynda da, jazýshy sońǵy bes jyl boıy 1,5 aıda bir roman basyp shyǵarýda. Qazirgi ýaqytta onyń qalamynan 147 roman, 400 astam maqala, 50 jýyq telestsenarıı shyqty. Onyń kitaptary 28 tilge aýdarylyp, TMD elderi, AQSh, Ulybrıtanııa, Frantsııa, Italııa, Shvetsııa, Norvegııa, Danııa, Belgııa, Germanııa, Túrkııa, Iran, Rýmynııa, Izraıl, Bolgarııa, Polsha, Serbııa, Albanııa, Baltyq, Vengrııa syndy elderde jalpy tırajy 26 mıllıon kitap bolyp basyldy.
1989 jyldan bastap jazýshylyqpen qatar Ázirbaıjan jazýshylar odaǵynyń hatshysy men ázirbaıjandyq PEN-klýbtyń vıtse-prezıdenti qyzmetterin atqaryp júr.
«Men Qazaqstanǵa kelgenime óte qýanyshtymyn. Maǵan Sizderdiń halyqtaryńyz unaıdy, al onyń ystyq dostyǵy meniń janymdy masattandyrady. Menińshe búgingi shyǵarmashylyq kesh eseli bolady. Sebebi munda biz dostarymyzben birge kezdesýdemiz», - deıdi ázirbaıjandyq jazýshy.
