Astanada tanymal ártister qaıyrymdylyq kontsertin ótkizdi
ASTANA. Tamyzdyń 13-i. QazAqparat /Jasulan Amanbaıuly/ - Keshe, tamyzdyń 12-si kúni astanalyq Beıbitshilik jáne kelisim saraıynda «Ómir úshin» aktsııasy aıasynda tanymal ártisterdiń qatysýymen qaıyrymdylyq kontserti ótti.
Keshte Ernar Myńtaevtyń basqarýyndaǵy Ǵ.Jubanov atyndaǵy Memlekettik shekti kvarteti, Romanovtyń A'capella Band hory jáne tanymal estrada juldyzy Batyrhan Shúkenov jınalǵan qaýym aldynda ónerlerin pash etti.
Kontsertten túsken qarjy asa aýyr ókpe dertine shaldyqqan 27 jastaǵy astanalyq azamatsha Ásel Qurmanǵalıevanyń emdelýine jumsalady. Aktsııa aıasynda ózgeniń qaıǵysyna qabyrǵasy qaıysatyn adamdar, áriptester men joldastardyń kómegimen shamamen 15 000 eýro jınalǵan kórinedi. Shetel emhanasy Áseldiń operatsııasy men hımıoterapııasyna qajetti qarajatty 60 myń eýroǵa baǵalap otyr.
«Búgingi qaıyrymdylyq kontsert bir adamnyń ómirin qutqarýǵa arnalǵan eleýli shara. Ásel Qurmanǵalıeva basyna qandaı is túspesin moıymaıtyn jan. Dárigerlerdiń shyǵarǵan «úkiminen» keıin de ol ómir súrip, qaterli dertke qarsy kúresýde. Sondyqtan bizdiń búgingi qaıyrymdylyq kontsert «Ómir úshin» dep atalady», deıdi uıymdastyrý komıtetiniń jetekshileriniń biri, Áseldiń jaqyn týysy Bıbigúl Mahmetova.
«Biz Áseldiń týystary atynan búgingi kontsertti aqysyz ótkizýge kelisken ártisterge myń alǵysymyzdy bildiremiz», deıdi ol.
Onyń aıtýynsha, Qazaqstanda beıdaýaǵa (rak) qarsy shetelge emdelýge kvota berilmeıdi.
