Astanada tańerteńnen beri 100-ge jýyq kólik apaty boldy

ASTANA. KAZINFORM – Astanada tańerteńnen beri 100-ge jýyq jol-kólik oqıǵasy boldy. Bul týraly qalalyq Polıtsııa departamentiniń baspasóz qyzmeti habarlady. 

— Tańerteńnen beri elordada 100-ge jýyq jol-kólik oqıǵasy tirkeldi. Aýa raıynyń qolaısyzdyǵyna baılanysty Polıtsııa departamenti júrgizýshilerge barynsha saq bolýyn eskertedi, - delingen habarlamada.

Sondaı-aq vedomstvo júrgizýshilerge myna jaılarǵa mán berýde eskertedi: 

— Jeke kólikpen shyqqanda aýa raıyna baılanysty jarııalanǵan eskertýlerdi bir qarap alǵan jón (qar, burqasyn, kóktaıǵaq jáne t. b.);

— Shuǵyl burylmaý kerek jáne aldyda kele jatqan kólikpen araqashyqtyqty ádettegiden bir jarym, eki esedeı alys ustaǵan jón.

Qazirgi sátte Astanadan shyǵatyn barlyq avtojoldar jabyq tur. 

Aıta keteıik, Astanada qar kúreýge 1 600-den astam arnaıy tehnıka shyǵaryldy.