Astanada «Tańdaýly patsıenttiń» esimi ataldy
ASTANA. QazAqparat - Elorda emhanalarynda bıylǵy jyldyń mamyr aıynda bastalǵan «Tańdaýly patsıent» respýblıkalyq konkýrsynyń birinshi jáne ekinshi kezeńderi qorytyndylandy. Bul týraly qalalyq densaýlyq saqtaý basqarmasyna silteme jasap, Astana ákimdiginiń baspasóz qyzmeti habarlady.
Konkýrstyń birinshi týry Astananyń ambýlatorlyq-emhanalyq uıymdarynda júrgizildi. Onyń qorytyndylarymen 7 tańdaýly úmitker irikteldi, olar qurmet gamotalarymen jáne syılyqtarmen marapattaldy. Budan keıin osy qatysýshylar konkýrstyń ekinshi týryna ótti.
Densaýlyq saqtaý basqarmasynyń qyzmetkerleri barlyq usynylǵan kandıdatýralardy zerdelep, nátıjesinde jeńisti Valentına Ponomarenkoǵa berdi. Ol bizdiń qalamyzdyń «Tańdaýly patsıenti» atandy. Bul jeńiske jetýge onyń óz densaýlyǵyna jaýapkershilikpen qaraýy múmkindik berdi, konkýrstyń da basty ólshemi osy bolatyn. Sondaı-aq ol dárigerge júıeli qarala otyryp, dári-dármekterdi ýaqytynda qabyldap otyrdy jáne salaýatty ómir saltyn ustandy, bul Valentınanyń múgedektiktiń ekinshi tobynan úshinshisine aýysýyna múmkindik berdi. Bul onyń densaýlyǵy men ómir sapasynyń eleýli jaqsarǵanyn bildiredi. Endi ol QR Densaýlyq saqtaý mınıstrliginiń Respýblıkalyq densaýlyq saqtaýdy damytý ortalyǵy deńgeıindegi úshinshi týrǵa qatysyp, elimizdiń 14 oblysynyń turǵyndarymen eń tańdaýly ataǵyn ıelený úshin saıysqa túsedi.
Vedomstvo qyzmetkerleriniń aıtýynsha, bul sharanyń negizgi maqsaty - adamdardyń óz densaýlyǵy úshin jaýapkershiligin arttyrýǵa, dárilik zattarǵa durys qarym-qatynasyn qalyptastyrýǵa patsıentterdi yntalandyrý bolyp otyr.
