Astanada tamyz aıynyń aýa raıy qubylmaly bolady dep boljanýda
ASTANA. 27 shilde. QazAqparat - Shildeniń shilińgir ystyǵy kópke sozylmaıdy, al tamyz aıy jańbyrly bolady. «Gıdromed» ortalyǵynyń sınoptıkteri osylaı dep boljam jasap otyr. Kúnniń bulttanýy, jaýyn-shashyn sekildi qubylmaly aýa raıy kelesi aıda da saqtalady. Aýa temperatýrasy túnde+18°C, +25°C kórsetse, kúndiz +28°C, +33°C ystyq bolady dep kútilýde. Bul týraly astana.kz saıty jazady.
Atap aıtqanda, Astana qalasy «QazGıdromet» ortalyǵynyń jetekshi sınoptık-ınjeneri Janat Satybaldıevanyń aıtýynsha, Astanada tamyz aıy salqyn aýa raıymen bastalady. «Óıtkeni elimizdiń basym bóligi kezekti belsendi tsıklonnyń yqpalynda bolady. Osyǵan baılanysty keı jerlerde jańbyr jaýyp, naızaǵaı oınap, jel kúsheıedi. Aıdyń ortasynda jaýyn-shashyn doǵarylyp, aýa temperatýrasy 28-33 gradýsqa deıin joǵarylaıdy. Aıdyń ekinshi jartysynda qaıtadan kún buzylady. Osylaı jańbyrly kúnder jazdyń jaıma-shýaq kúnderimen almasyp otyrady. Jalpy, aı boıynsha temperatýra kópjyldyq mólsher shamasynda bolady», - deıdi ol.
Jalpy, Astanada 1923 jyly aýa temperatýrasy absolıýttik maksımýmǵa jetip, 39°C ystyqty kórsetse, 2002 jyly 38°C deıin ysyǵan. Al bıylǵy jylǵy aýa raıyn mamandar 2003 jyldyń jazyna uqsatyp otyr.
