Astanada tamaqtaný oryndarynda órt qaýipsizdigi qalaı qamtamasyz etilip jatyr
ASTANA. KAZINFORM – Elordadaǵy qoǵamdyq tamaqtaný nysandarynda ótken jyldan beri órttiń aldyn alý boıynsha júıeli jumys júrgizilýde. Qabyldanyp jatqan sharalar týraly Astanalyq TJD memlekettik órt baqylaý basqarmasy bastyǵynyń orynbasary Ǵabıt Babaev, Investıtsııalar jáne kásipkerlikti damytý basqarmasy basshysynyń orynbasary Nurjan Áshimov, Polıtsııa departamentiniń qoǵamdyq qaýipsizdik basqarmasy bastyǵynyń mindetin atqarýshy Qanat Nysantaev málimdedi, dep habarlaıdy qala ákimdiginiń resmı saıty.
Spıkerlerdiń aıtýynsha, qoǵamdyq tamaqtaný oryndarynda órttiń shyǵýyna kóbine elektr jelilerindegi qysqa tuıyqtalý, as úıdegi sorǵyshtarda maı qaldyqtarynyń ýaqytyly tazalanbaýy, gaz ballondaryn paıdalaný talaptarynyń buzylýy jáne otty abaısyz qoldaný sebep bolady. Ásirese doner satatyn oryndar, tandyrhanalar, ashanalar men dámhanalar asa qaýipti nysandar sanalady.
Qazaqstan Respýblıkasy Bas prokýratýrasynyń tapsyrmasyna sáıkes, iri jáne órt qaýpi joǵary saýda nysandarynda jospardan tys tekserýler júrgizilgen. 25 nysanda órt qaýipsizdigi talaptarynyń 1056 buzýshylyǵy anyqtalyp, basshylarǵa kemshilikterdi joıý merzimi kórsetilgen nusqamalar berildi. Qazirgi ýaqytta olardyń oryndalýy baqylaýda, al keıbir faktiler boıynsha ákimshilik sharalar qoldanylyp, materıaldar sotqa joldanǵan.
Sonymen qatar profılaktıka maqsatynda qoǵamdyq tamaqtaný oryndarynda jospardan tys 41 tekserý júrgizilip, órt sóndirýdiń bastapqy quraldarynyń jaramsyzdyǵy, evakýatsııalyq shyǵý joldarynyń bitelýi, gaz ballondaryn ǵımarat ishinde saqtaý, elektr symdarynyń qaýipsizdik talaptaryna saı kelmeýi sııaqty kóptegen zańbuzýshylyqtar anyqtalǵan.
Aýdan ákimdikterimen birlesip, saýda úıleri men iri saýda ortalyqtarynyń aýmaǵyndaǵy fastfýd pavılondary, doner jáne býrger satylatyn oryndar da tekserildi. Nátıjesinde 100-den astam zańbuzýshylyq tirkelip, 78 pavılon demontajdaldy, altaýy ǵımarat qasbetinen qaýipsiz qashyqtyqqa kóshirildi.
«2025 jyldyń 27 jeltoqsanynan bastap elordada TJD, aýdan ákimdikteri men polıtsııa organdarynyń mamandarynan quralǵan vedomstvoaralyq jumys toby jumys istep keledi. Top 210-nan astam qoǵamdyq tamaqtaný nysanynda túsindirý jáne aldyn alý sharalaryn júrgizýde. Negizgi nazar jeldetý jáne sorǵy júıeleriniń jaǵdaıyna, elektr jabdyqtarynyń jaramdylyǵyna, paıdalaný talaptary men órtke qarsy araqashyqtyqtardyń saqtalýyna aýdarylady», – dedi spıkerler.
Sondaı-aq personalǵa órt kezinde áreket etý algorıtmderi boıynsha oqytý júrgizilýde. Barlyq is-shara tek profılaktıkalyq sıpatta, jazalaý sharalaryn kózdemeıdi jáne yqtımal qaýip-qaterlerdiń aldyn ala anyqtaýǵa baǵyttalǵan. Maqsat – nysandardaǵy qaýipsizdik deńgeıin arttyrý jáne kásipkerlerdiń órt qaýipsizdigi talaptaryna jaýapkershilikpen qaraýyn qalyptastyrý.
Іshki ister organdary mamandandyrylǵan órt qadaǵalaý qyzmeti bolmasa da, órttiń aldyn alý jumystaryna belsendi qatysyp keledi. Polıtsııa qyzmetkerleri evakýatsııalyq shyǵý joldarynyń ashyq bolýyn baqylap, adamdar kóp jınalatyn nysandarda qaýipsizdik talaptarynyń saqtalýyn tekseredi.
Azamattardyń ómiri men densaýlyǵyna qaýip tóngen jaǵdaıda polıtsııa ýákiletti azamattyq qorǵaý organdaryna habarlap, qajet bolǵan kezde ákimshilik sharalar qoldanady. Negizgi maqsat – quqyqbuzýshylyqtardyń aldyn alý jáne kásipkerlerdiń órt qaýipsizdigine jaýapty kózqarasyn qalyptastyrý.
Qoldanylyp jatqan profılaktıkalyq sharalar kesheni órt sanynyń azaıýyna, azamattardyń ómiri men densaýlyǵyn qorǵaýǵa, sondaı-aq kásipkerler úshin qaýipsiz eńbek jaǵdaıyn jasaýǵa baǵyttalǵan.
Aıta keteıik, Aqtóbede qoǵamdyq tamaqtaný ornynda gaz jabdyǵy jarylyp, bes adam aýrýhanaǵa tústi.