Astanada taldyqorǵandyq ushqyshtyń apellıatsııalyq shaǵymy qaralady
TALDYQORǴAN.QazAqparat- 13 naýryz kúni Astanadaǵy QR áskerı sotynda ushqysh Ádilbek Ysqaqovtyń apellıatsııalyq shaǵymy qaralady. Protsess saǵat 10:00- ge belgilengen, dep habarlaıdy QazAqparat tilshisi.
Ushqysh týystarynyń sońǵy úmiti apellıatsııalyq sot. Sebebi olar Ádilbektiń jazyqsyz sottalyp otyrǵanyna senimdi. Jary Ajar Ysqaqovanyń aıtýynsha, Ádilbek Ysqaqov óz isine úlken jaýapkershilikpen qaraıtyn tájirıbeli ushqysh.
«Al ushaqtyń janarmaıyn tekserý onyń mindetine jatpaıdy. Áskerı talap pen ushqyshtardyń ushý tártibinde ol tek ushaqty ushyryp, qondyrýǵa, ushý barysyndaǵy tapsyrmalardy oryndaýǵa ǵana mindetti. Al áýe kóliginiń tehnıkalyq jaǵdaıyna, janarmaıyna jerdegi arnaıy qyzmetkerler jaýap berýi tıis. Sondaı-aq ınjener men tehnıkter ushaqtyń qoldanýǵa daıyn ekeni týraly esep beredi. Bul jaǵdaıda Ádilbek óz mindetin tolyq oryndady. Ushaqty qabyldap, aspanǵa kóterildi. Aqaý myńdaǵan metr bıiktikte belgili boldy. Jerdegilerdiń nusqaýy boıynsha ushaqty eldi mekenderden alystatyp, bir-aq sekirdi. Ol kezde meniń kúıeýim batyr boldy. Al qazir abaqtyda jatyr», - deıdi Ajar Ysqaqova.
Ushqyshtyń zaıyby qazir kúıeýin aqtap alýǵa ózi kiristi. Sebebi ózi de áskerı salada qyzmet etedi. Ádilbek Ysqaqovtyń áskerı sheberligin dáleldeýdiń qajeti shamaly. Ómiriniń 13 jylyn áýe qorǵanysyna arnaǵan ushqyshtyń marapattary da az emes. Anasy Kúlásh Mádıhanovanyń aıtýynsha, Jeńistiń 70 jyldyǵynda Astana aspanynda «70» sanyn órnektegen ushqyshtar qatarynda uly Ádilbek te bolǵan. Sol kezde ol 7 sanyn sheberlikpen salyp shyqty.
Esterińizge sala keteıik, 2018 jyldyń 15 qańtarynda Taldyqorǵan garnızony áskerı sotynyń tóraǵasy Rınat Aqpar Ádilbek Ysqaqovqa shyǵarylǵan sot sheshimine túsinikteme bergen bolatyn.
«Sý-27 ushaǵynyń janarmaıyn teksermeı, ushaqty qabyldap ushyp ketkeni anyqtaldy.Ushyp bara jatqanda otynnyń az mólsheri saldarynan apattyq janarmaı teńgerimin kórsetken qurylǵylar iske qosylǵan. Alaıda áskerı qyzmetker ushý erejelerin buza otyryp, qurylǵylardyń senimdiligine kúmán keltirip, basshysyna onyń janarmaıynyń qalǵan bóligi týraly shyndyqty aıtpaı, qate aqparat bergen», - dedi Taldyqorǵan garnızony áskerı sotynyń tóraǵasy R. Aqpar. 
Aıta ketý kerek, 2016 jyldyń 21 jeltoqsanynda Taldyqorǵan mańynda Sý 27 ushaǵy apatqa ushyraǵanyn habarlaǵan bolatynbyz.
