Astanada talaı stýdentti aldaǵan alaıaq ustaldy
ASTANA. 19 qarasha. QazAqparat - Elordanyń polıtsııa qyzmetkerleri Jambyl oblysynyń 21 jastaǵy turǵynyn ustady. Ol stýdentterden jataqhanaǵa ornalasýǵa kómektesemin degen jeleýmen aqsha alyp otyrǵan, dep habarlady Astana qalasynyń ІІD baspasóz qyzmetinen.
Astananyń joǵary oqý oryndarynyń birinen 12 stýdent polıtsııaǵa aryzdanyp, A. esimdi azamat olardyń aqshasyn ıemdenip ketkenin aıtqan.
Tergeý barysynda anyqtalǵandaı, alaıaq stýdentterdiń senimine kirip, jataqhanadan oryn alyp berýdi usynyp, olardyń árqaısysynan 60 myń teńgeden alǵan.
Atalǵan fakti boıynsha QR QK 177-baby boıynsha qylmystyq is qozǵaldy.
Qazirgi ýaqytta ustalǵan adam Astana qalasynyń ІІD ýaqytsha ustaý oqshaýlaǵyshyna qamaldy. Tergeý júrgizilýde.
