Astanada talaptardy saqtamaǵan «Green» dúkenderiniń jumysy toqtatylady - Tutynýshylar quqyǵyn qorǵaý departamenti
ASTANA. QazAqparat - Astana qalasynda 2500-nan astam saýda nysandary bar. Bul týraly elordada ótken «Saýda nysandaryna qoıylatyn sanıtarlyq-epıdemıologııalyq erejeler men tehnıkalyq reglamentter talaptary, tutynýshylar quqyǵyn qorǵaý máseleleri» atty dóńgelek ústel barysynda belgili boldy.
Jalǵa alýshylardyń jıi aýysyp turýyna baılanysty nysandardyń 40% óz isterin sanıtarlyq-epıdemıologııalyq qorytyndysyz, sanıtarlyq erejeler talaptaryn buzýmen júrgizýde. «Saýda ortalyqtary, saýda jelileri men dúkenderdiń sanıtarlyq erejelerge sáıkes jumys jasaýyn qadaǵalaý boıynsha jumystar atqarylýda. Búgingi tańda turǵyndar tarapynan kelip túsetin aryz-shaǵymdar men tekseris jumystarynyń nátıjesinde keıbir saýda ortalyqtarynyń sanıtarlyq erejelerdi buzatyny anyqtaldy. Dúkenderde azyq-túlik taýarlarynyń qaýipsizdigi qadaǵalanbaıdy», - deıdi Astana qalasy Tutynýshylar quqyǵyn qorǵaý departamentiniń basshysy Nurlybek Asylbekov. Onyń aıtýynsha, mundaı saýda oryndary qatarynda «Green» sýpermarketter jelisi, «Baýrsakoff» tez tamaqtaný meıramhanasy men «Zabava» dúkeni jatady. «Green» dúkenine qatysty birneshe ret shaǵymdar tústi. Jyl basynan beri olarǵa bir mıllıon teńgeden astam aıyppul salynǵan. Eger buzýshylyqtardy joımaıtyn bolsa, hattama toltyryp, isti sotqa berýge tolyq quqyǵymyz bar. Bul jaǵdaıda oǵan iri kólemde aıyppul salynyp, onyń jumysy toqtatylady» - dedi departament basshysy. Sonymen qatar ol bul baǵyttaǵy jumystarǵa qala tuǵyndary men qoǵamdyq uıymdardy tartý kózdelip otyrǵanyn atap ótti, dep habarlaıdy astana.kz .
