Astanada «Talan» kórkem fılminiń tusaýy kesildi
ASTANA. QazAqparat - Búgin Astanadaǵy «Sary-Arqa» kınoteatrynda «Talan» jańa kórkem fılminiń tusaýkeseri ótti. Fılmdi QR Mádenıet jáne sport mınıstrliginiń tapsyrysy boıynsha Sh.Aımanov atyndaǵy «Qazaqfılm» kınostýdııasy túsirdi. Bul týraly kınostýdııanyń baspasóz qyzmetinen málim etti, dep habarlaıdy QazAqparat tilshisi.
Fılmniń tanystyrylymyna Qazaqstannyń eńbek sińirgen qaıratkeri Bolat Qalymbetov, akterler - Qazaqstannyń eńbek sińirgen qaıratkeri Shynar Jańysbekova, Erik Joljaqsynov, Erjan Nurymbet jáne Asan Májıt qatysty.
Tarıhı drama HH ǵasyrdyń 30-40 jyldaryndaǵy basty keıipkerdiń ómiri jaıly syr shertedi. Fılmniń stsenarııin Júsipbek Qorǵasbektiń «Qasqyr adam» áńgimesi negizinde Ǵazız Nasyrov pen Bolat Qalymbetov jazyp shyqqan. Kıno túsirilimi Almaty qalasy men Almaty oblysynda júrgizildi.
«Fılmde halqymyz tarıhynyń kúrdeli kezeńi - ótken ǵasyrdyń 30-40 jyldary baıandalady. «Talan» sózi «taǵdyr» degendi bildiredi. Mine, sondyqtan, fılmniń basty maqsaty - sol dáýirdegi adamnyń beınesin ashý jáne onyń taǵdyryn baıan etý. Men Mádenıet jáne sport mınıstrligine, «Qazaqfılm» kınostýdııasyna, sondaı-aq búkil fılm tobyna úlken alǵysymdy bildiremin. Senim bildirgenderińizge rahmet!», - dedi baspasóz máslıhatynda rejısser Bolat Qalymbetov.
Al akter Asan Májıt buǵan deıin tek epızodtyq rólderde oınaǵanyn aıtady.
«Bir kúni birden úsh fılmniń basty rólinde oınaý usynystary jasaldy. «Tarazda» bandıtti oınaý qıyn emes edi. Biraq «Talan» týyndysynda men qolymnan kelgenniń bárin jasadym. Bolat Qalymbetov bul rólge meni eki jyldan astam ýaqyt daıyndady», - deıdi akter Asan Májıt.
Fılmge sondaı-aq Erik Joljaqsynov (Talasbek), Shynar Janysbekova (Bıbisara), Erjan Nurymbet (Shorman), Ulan Núsipáli (Shúkir) men Ońdasyn Besikbaspv (Qastek) túsken.
Eske sala ketsek, budan buryn atalmysh kartına Iranda ótken Halyqaralyq kınofestıvalde kórsetilgen bolatyn.
