Astanada taksıst áıelge qoqan-loqy kórsetken er adam 10 táýlikke qamaldy
ASTANA. KAZINFORM – Astana qalasynyń ákimshilik quqyq buzýshylyqtar jónindegi mamandandyrylǵan aýdanaralyq sotynda azamat A.-ǵa qatysty QR ÁQBtK-niń 434-babynyń 1-bóligi boıynsha usaq buzaqylyq jasaý faktisi jónindegi ákimshilik isti qarady, dep habarlaıdy atalǵan sottyń baspasóz qyzmeti.
Sot otyrysynda anyqtalǵandaı, Astana qalasyndaǵy qoǵamdyq tamaqtaný oryndarynyń biriniń mańynda taksı qyzmetin paıdalanyp, sapar aıaqtalǵannan keıin azamat A. taksı júrgizýshisi S.-ǵa balaǵat sózder aıtyp, avtokólikten shyǵýdan bas tartqan jáne oǵan qoqan-loqy kórsetken.
Osylaısha, A. óz áreketterimen aınalasyndaǵylarǵa anyq qurmetsizdik tanytyp, qoǵamdyq tártip pen jeke tulǵalardyń tynyshtyǵyn buzǵan.
Atalǵan fakti polıtsııa basqarmasynda áleýmettik jelidegi Instagram-da oqıǵanyń beınejazbasy jarııalanǵannan keıin tirkelgen. Sot otyrysynda A. óz kinásin tolyq moıyndady.
Sot qaýlysy
Sot azamat A.-ny QR ÁQBtK-niń 434-babynyń 1-bóliginde kózdelgen ákimshilik quqyq buzýshylyqty jasaǵany úshin kináli dep tanydy.
– Ákimshilik jaza taǵaıyndaý kezinde sot jasalǵan quqyq buzýshylyqtyń sıpaty men aýyrlyǵyn eskerdi. Quqyq buzýshylyq qasaqana jasalyp, qoǵamdyq tártipti buzýdan, aınalasyndaǵylarǵa qurmetsizdik tanytýdan jáne ózge tulǵalardyń tynyshtyǵyn buzýdan kórinis tapqan. QR ÁQBtK-niń 434-babynyń 1-bóliginde 20 AEK mólsherinde aıyppul salý ne 5-ten 10 táýlikke deıingi merzimge ákimshilik qamaqqa alý túrindegi ákimshilik jaza kózdelgen, – dep jazdy sottyń baspasóz qyzmeti.
Astana qalasynyń ákimshilik quqyq buzýshylyqtar jónindegi mamandandyrylǵan aýdanaralyq sotynyń qaýlysymen azamat A.-ǵa 10 táýlik merzimge ákimshilik qamaqqa alý túrindegi ákimshilik jaza taǵaıyndaldy.
Sot qaýlysy zańdy kúshine engen joq.
Aıta keteıik, buǵan deıin Astanada ushaq bortynda janjal shyǵarǵan mas jolaýshy 10 táýlikke qamalǵan edi.
Al Aqtaýda qyzǵa zorlyq kórsetemin dep qorqytqan er adam 30 táýlikke qamaldy.
