Astanada taksıdiń eń tómengi tarıfi arzandady
ASTANA. QazAqparat - Astana qalasy júrgizýshiler qaýymdastyǵynyń tóraǵasy Medet Qurmanov ASTANA TAXI qyzmetiniń resmı qyzmetkerine qatysty áleýmettik jelide jazylǵan synǵa jaýap berdi, dep habarlaıdy «QazAqparat» HAA tilshisi.
Onyń aıtýynsha, shaǵym berý kezinde júrgizýshini anyqtaý úshin mindetti túrde kóliktiń nómiri aıtylýy kerek.
«Búgin biz áleýmettik jelide ASTANA TAXI qyzmetiniń baǵasy qymbat ekenin, júrgizýshisi mádenıetsiz jáne onyń qyzmet kórsetýi tómen deńgeıde ekenin estip jatyrmyz. Biz bul jaǵdaıǵa qatysty sóz talastyrǵymyz kelmeıdi. Biraq áleýmettik jeli qoldanýshylary kóliktiń nómirin nemese júrgizýshiniń kim ekenin aıtpaǵannan keıin biz naqty sharalardy qoldana almaı otyrmyz», - deıdi Qurmanov.
Qaýymdastyq tóraǵasy qala turǵyndary men qonaqtaryna mundaı jaǵdaı týyndasa ASTANA TAXI qyzmetiniń call-ortalyǵyna (15800 nómirine) habarlasýǵa nemese 8700 555 76 07 nómiri boıynsha WhatsApp arqyly shaǵym joldaýǵa bolatynyn aıtady. Shaǵymdanar kezde mindetti túrde kóliktiń memlekettik nómiri bolýy kerek. Qurmanov sonymen birge, óz sózinde mundaı keleńsiz jaıǵa tap bolǵan adamdardan keshirim surady.
Buǵan qosa qalalyq júrgizýshiler qaýymdastyǵynyń tóraǵasy taksı qyzmetiniń baǵasy týraly pikirin bildirdi.
«Tarıfti taksomotorlyq kompanııanyń ózi belgileıdi. Biraq búgingi tańda baǵa ekonomıkalyq jolmen qoıylmaıdy, ıaǵnı kólikti paıdalaný jáne osy kezeń ishinde qyzmet kórsetýdiń barlyq jıyntyǵynan quralatyn barlyq turaqty jáne ózgermeli shyǵystar eskerilmeıdi. Eger osyndaı ádisti qoldansaq, onda baǵa qazirgiden joǵary bolýy kerek. Sondyqtan, taksoparkter naryqqa táýeldi», - deıdi ol.
Medet Qurmanovtyń sózine súıensek, taksomotorlyq kompanııalar jolaýshylardy tasymaldaý boıynsha kúndelikti nusqaýdan ótedi.
«Elektrondyq taksometrler árbir avtokólikte ornalastyrylǵan. Onsyz júrgizýshi jelige jiberilmeıdi. Biraq taksıstter men tutynýshylar ózara kelisip alyp, júrý de ádetke aınalyp ketti. Resmı tasymaldaýshylarda baǵa qymbat degen túsinik qalyptasty. Biraq olaı emes. ASTANA TAXI Biryńǵaı qyzmetiniń eń tómengi tarıfi 700 teńgeden 500 teńgege tómendedi», - deıdi ol.
