Astanada taksı júrgizýshisin pyshaqtap ketken kúdikti ustaldy
ASTANA. QazAqparat - Kúdikti júrgizýshiden aqsha talap etip, oǵan pyshaq jaraqatyn salyp, oqıǵa ornynan belgisiz baǵytta boı tasalaǵan, dep habarlaıdy QazAqparat qalalyq Polıtsııa departamentine silteme jasap.
«Jekemenshik tasymaldaýmen aınalysatyn taksı júrgizýshisi jolaýshyny Y. Dúkenuly kóshesine deıin alyp kelgen. Úıdiń aýlasynda mas kúıinde bolǵan jolaýshy men júrgizýshi sózge kelispeı qalǵan. Sodan soń kúdikti júrgizýshiden aqsha talap etip, oǵan pyshaq jaraqatyn salyp, artynsha belgisiz baǵytta boı tasalaǵan. Kezdeısoq ótip bara jatqan er adam oqıǵa ornyna jedel járdem men polıtsııany shaqyrǵan. Jaraqattanǵan taksı júrgizýshisi der kezinde aýrýhanaǵa jetkizildi», - delingen vedomstvonyń habarlamasynda.
Habarlamada aıtylǵandaı, kezdeısoq kýáger polıtsııa qyzmetkerlerine kúdiktiniń belgilerin aıtyp berdi.
«Jedel-izdestirý is-sharasynyń nátıjesinde kúdikti er adam jaqyn mańdaǵy úılerdiń biriniń aýlasynda ustaldy. Keıin anyqtalǵandaı, ol buryn isti bolǵan Jambyl oblysynyń 28 jasar turǵyny bolyp shyqty», - dep habarlaıdy polıtsııa departamenti.
Qazirgi ýaqytta kúdikti ýaqytsha ustaý oqshaýlaǵyshyna qamalyp, atalǵan fakti boıynsha QR QK 192-babyna sáıkes sotqa deıingi tergeý júrgizilýde. Sondaı-aq, ustalǵan azamattyń buryn jasalǵan basqa da qylmystarǵa qatystylyǵy tekserilýde.
Osyǵan baılanysty ustalǵan kúdiktiniń qylmystyq is-áreketinen zardap shekken azamattardy Astana qalasynyń Polıtsııa departamenti Beıbitshilik kóshesi, 19 mekenjaıyna nemese 8 (7172) 71-60-21, 71-61-47, 102 telefondaryna habarlasýyn suraıdy.
