Astanada taksı júrgizýshisi jolaýshynyń zatyn qaıtarý úshin aqsha talap etken
ASTANA. QazAqparat - Astanada taksı júrgizýshisi kóliginde qalyp qoıǵan jolaýshynyń sómkesin qaıtaryp berý úshin aqsha talap etken, dep habarlaıdy QazAqparat Elorda Infoǵa silteme jasap.
Qalalyq polıtsııa departamentiniń málimetinshe, keshki saǵat 21.00-der shamasynda Jedel basqarý ortalyǵyna qala turǵyny taksıde sómkesi (ishinde noýtbýk, planshet, oıyn qondyrǵysy) qalyp ketkenin, kólik júrgizýshisi ony qaıtaryp berý úshin 100 myń teńgedeı aqsha talap etkenin aıtyp shaǵymdanǵan.
«Jábirlenýshi áıel «Lada Priora» markaly avtokólikke Indriver servısi arqyly tapsyrys bergen. Baratyn jerge kelgen soń, ol avtokólikten túsken kezde júrgizýshi ornynan tez júrip ketken. Áıel sómkesin alyp úlgermegen», delingen habarlamada.
Polıtsııa avtokólikti anyqtap, júrgizýshini ustady. Salonnyń ishinen jolaýshynyń jeke múlki tabylyp, ıesine qaıtaryldy.
Qazirgi ýaqytta atalmysh oqıǵa boıynsha tergeý júrgizilip jatyr.
