Astanada «Taǵzym men taǵylym» atty memlekettik tildiń mártebesin kóterýge arnalǵan shara ótti

dep habarlaıdy QazAqparat.

Tilderdi damytý basqarmasynyń bastyǵy Orazkúl Asanǵazynyń aıtýynsha, jalpy bul qala boıynsha uıymdastyrylǵan jalǵyz shara emes. «Tamyzdyń 23-i kúni Astanada 12-shi qalalyq tilder festıvali Abaı eskertkishiniń aldynda aqynǵa taǵzym etýden bastalǵan bolatyn. Búgin, elordadaǵy Bógenbaı batyrdyń eskertkishine gúl shoqtaryn qoıyp, babaǵa bas ıdik. Bıyl 100 jyldyǵyn toılap otyrǵan Baýkeńniń eskertkishiniń aldyna da taǵzym jasadyq», dedi ol.

Sondaı-aq aldaǵy kúnderi «Taǵzym men taǵylym» aıdary aıasynda Jánibek pen Kereı handardyń jáne Kenesary Qasymuly eskertkishteriniń aldynda óskeleń urpaqqa ónege bolarlyq rýhanı basqosýlar uıymdastyrylyp, babalar rýhyna taǵzym jasalmaq.

Uıymdastyrýshylar osyndaı keshter arqyly, qazaqtyń uly tulǵalary arqyly memlekettik tildiń qoldanys aıasyn keńeıtýdi, mártebesin bıiktetýdi kózdeıdi.

«Oryssha, aǵylshynsha, qytaısha bile ber, biraq óz ana tilińde erkin sóıleýiń kerek. Óz elińdi ǵana emes, ózge elge qorǵan bolatyn jastar bolyńdar. Árbir qazaqstandyq memlekettik tildi meńgerip, ómirge keńinen engizý arqyly ózderiniń shyn ultjandy ekendigin bildirýi tıis», dedi O. Asanǵazy jurt aldynda sóılegen sózinde.

Sharaǵa L.N.Gýmılev atyndaǵy Eýrazııa ulttyq ýnıversıtetiniń stýdentteri, mektep oqýshylary men oqytýshylar, qala qonaqtary jınaldy. Mektep jasyndaǵy jetkinshekter aqynnyń óleńderin oqyp, qazaqtyń dástúrli ánderin shyrqady.

Jyldaǵy dástúr boıynsha festıval aıasynda memlekettik qyzmetkerler arasynda «Memlekettik til- memlekettik qyzmette» atty konkýrs, mektepke deıingi balalar arasynda «Kel, balalar, oqylyq!» atty balalar merekesi ótti. Budan bólek, bıylǵy festıvaldiń ereksheligi - «Tili birdiń - tilegi bir» atty qazaq tilin jetik meńgergen ózge ult ókilderiniń respýblıkalyq jastar forýmyn ótkizý kózdelgen.