Astanada taǵy bir sáýletti demalys alańy salynbaq
ASTANA. 9 qańtar. QazAqparat - Jaqyn arada elorda turǵyndary úshin jańa alań - demalys pen kóńil kóteretin jańa oryn ashylady. Bul týraly Astana qalasynyń bas josparymen tanysý barysynda belgili boldy.
Jańa dóńgelek alań Trıýmfaldy arkanyń janynda Orynbor dańǵyly men 25-kósheniń qıylysynda ornalasady. «Qazirgi ýaqytta Trıýmfaldy arkada jańa dóńgelek alań salynyp jatyr. Trıýmfaldy arka QR táýelsizdiginiń 20 jyldyǵyna oraı qurylǵan. Onyń sáýletin, bıiktigin, kólemin eskere kele, biz qala qurylysy keshenin, sáýlet ansamblin jasap jatyrmyz», - dedi qalalyq Sáýlet jáne qala qurylysy basqarmasynyń basshysy Vıtalıı Sıletskıı astana.kz saıtyna bergen suhbatynda. Aıta keteıik, alań terrıtorııasynda saýda oıyn-saýyq nysandary: meıramhanalar, dámhanalar men dúńgirshekter ornalasady. «Alań aýmaǵynda jerasty turaq jasalady, onda tehnıkalyq orynjaılar, dárethanalar bolady, bári de tómende. Alańnyń ózinde meıramhanalar, saýda oryndary ashylady, olar birinshi qabatta ornalasady. Alǵashqy eki qabat adamdardy tartý úshin jasalady, olardyń demalýyna, serýendeýine, kofe ishýine, balalarmen oınaýǵa arnalady. Alań qalanyń demalys jáne mádenıet ornyna aınalady. Bul jańa demalys ornynyń Astananyń jańa nyshany bolǵanyn qalaımyz», - dedi V. Sıletskıı.
