Astanada taǵy bir qylmystyq top ustaldy: Polıtsııa 37 keli gashısh tárkiledi

NUR-SULTAN. QazAqparat – Elordada arnaýly operatsııa ótkizilip, qalaǵa iri kólemde esirtki zattaryn jetkizýmenjáne satýmen aınalysyp kelgen qylmystyq topty ustaldy. Bul jaıynda Nur-Sultan qalalyq Polıtsııa departamentinen málim etti, dep habarlaıdy QazAqparat tilshisi.

«Uıymdastyrýshy ári esirtki zattaryn negizgi jetkizýshi Jambyl oblysynyń 32 jastaǵy turǵyny bolyp shyqty. Ony ustaý kezinde jol sómkesinen salmaǵy shamamen 27 keli bolatyn gashısh esirtki zaty tabyldy. Al ekinshi kúdikti – Qostanaı oblysynyń 31 jastaǵy turǵynynyń avtokóligin tintý barysynda salmaǵy 9 kelige jýyq gashısh esirtki zaty alynyp, tárkilendi», - dep atap ótedi vedomstvodan.

Osydan keıin polıtsııa qyzmetkerleri kúdiktilerdiń sybaılastaryn anyqtaý jáne ustaý úshin jedel izdeý is-sharasyn ótkizgen. Nátıjesinde esirtki qylmysyna qatysy bar taǵy 3 adam ustaldy. Arnaýly operatsııa barysynda jalpy salmaǵy 37 kelige jýyq esirtki zaty alyndy.

Kúdiktilerdiń ústinen qylmystyq is qozǵalyp, olar Nur-Sultan qalalyq Polıtsııa departamentiniń ýaqytsha oqshaýlaǵyshyna qamaldy. Qazirgi ýaqytta tergeý amaldary júrgizilip jatyr.

«Prezıdenttiń Qazaqstan halqyna Joldaýynda esirtkiniń taralýyna baılanysty qylmystyq áreketke tartylǵandardy jazalaýdy qatańdatýǵa basa nazar aýdarylǵan. Bizdiń aldymyzǵa osy problemany joıý mindeti júkteldi. Qajetti jedel is-sharalar qabyldanyp, esirtki qylmystaryn ashý úshin barlyq tehnologııalyq arsenal qoldanylady», - dedi Nur-Sultan qalalyq Polıtsııa departamentiniń basshysy Erjan Sadenov

Aıta keteıik, jyl basynan beri polıtsııa qyzmetkerleri zańsyz aınalymnan 130 keli esirtki zatyn tárkiledi. Onyń 2 keli 300 gramy – geroın, 80 kelisi – gashısh jáne 5 keli 700 gramy sıntetıkalyq esirtki zaty. 2 esirtki zerthanasy joıylyp, 49 esirtki saıty anyqtalyp, buǵattaldy.

Eske salaıyq, birer kún buryn elordada taǵy bir uıymdasqan qylmystyq top ustalyp, olardan 37 keli gashısh tárkilengen bolatyn.