Astanada taǵy 30 jyly aıaldama ornatylady
NUR-SULTAN. QazAqparat – «Astana LRT» kompanııasy jyl sońyna deıin astanada taǵy 30 jabyq aıaldama ornatý josparlap otyr. Bul týraly «Nur Otan» partııasynyń astanalyq fılıalynda «Erkin pikir» is-sharasynda belgili boldy, dep habarlaıdy QazAqparat Elorda Infoǵa silteme jasap.
Sharada qaladaǵy qoǵamdyq kólikterdiń problemasy talqylandy.
Jıyn barysynda «Astana LRT» JShS tóraǵasynyń orynbasary Baýyrjan Seıitov elordadaǵy qoǵamdyq kólikterdiń tóńireginde bolyp jatqan problemalardyń júıeli sheshilip jatqanyn málim etti. Ol onlaın tólem joldarynyń artyqshylyǵyn, Astra kartasyn arnaıy apparattar arqyly ǵana emes, bank qosymshasy arqyly telefonmen de toltyrýǵa bolatynyn túsindirip ótti.
Jınalǵandar «Astana LRT» JShS tóraǵasynyń orynbasaryna oılarynda júrgen saýaldaryn qoıdy. Kezdesýde sóz alǵan Baıqońyr aýdany Ardagerler uıymynyń tóraǵasy Sársembaı Myńbaev máseleni jipke tizgendeı etip jetkizdi.
«Qaladaǵy avtobýstardyń ıntervaly tym uzaq. Máselen, «Óndiris» turǵyn alabyn alaıyq. Bul jerde 35-40 myń adam turady. Bir qıyndyǵy bul jaqqa baratyn avtobýs sanaýly. Jurtshylyq kóbine №24 baǵyttaǵy avtobýspen qatynaıdy. Al tańerteń onyń ishine kirýdiń ózi muń. Turǵyndardyń keıbiri birneshe avtobýsty ótkizip baryp minetine shaǵymdanyp jatady. Budan bólek, júrgizýshiler aıaldamaǵa alystaý toqtaıdy. Bul ásirese múgedek jandar men sábıi bar analardyń arbasymen kirip-shyǵýyna qıyndyq týdyrady. Sondaı-aq ár mekteptiń mańaıyna jyly aıaldamalar ornatý qajet», - dedi Sársembaı Myńbaev.
Oǵan Baýyrjan Seıitov astanada avtobýstyń ǵana emes, júrgizýshiler sanynyń azdyǵyn da atap ótti.
«Qazir júrgizýshilerdiń jol erejesin saqtaýyna qatty mán berip otyrmyz. Biraq olardy tártip buzǵan saıyn birden jumystan shyǵaryp jibere almaımyz. Sebebi júrgizýshiler onsyzda az. Eger bireýin jumystan shyǵaryp jibersek, erteńinde ol avtobýs toqtap qalady. Al ekinshi máselege keler bolsaq, astana boıynsha 1 100 aıaldama bolsa, onyń 730-ynda pavılon bar. Al qala boıynsha 100 jyly aıaldama ornatylǵan. Jyl sońyna deıin taǵy 30 jabyq aıaldama ornatýdy josparlap otyrmyz. Qazir osy baǵytta ınvestorlarmen kelissózder júrip jatyr», - dep jaýap qatty «Astana LRT» JShS tóraǵasynyń orynbasary.
Al «Astana LRT» qyzmetkeri bir baǵytty kóshelerdiń máselesi qazir talqylanyp jatqanyn aıtty.
«Bir baǵytty júıege basqa kóshelerdi aýystyrýdy jón kórip otyrmyz. Olar – Qonaev, Dostyq, Aqmeshit Túrkistan kósheleri. Ázirge bul jóninde naqty sheshim qabyldanǵan joq. Biraq Kereı, Jánibek handar kóshesin qarastyryp kóremiz. Al №46 baǵyttaǵy avtobýs rasymen qalanyń jurtshylyq kóp qatynaıtyn tustarymen júredi. Degenmen josparlanǵan 22 qoǵamdyq kóliktiń 20-21-i jolaýshylarǵa kúndelikti qyzmet kórsetedi. Bir aıtarym, qala ákimi iske qosqan «Akselerator» jobasy eki aptadan beri jumys istep keledi. Mine, osy jobada qalanyń belsendi turǵyndary ózekti máselelerdi talqylap turady. Sizdi osy jobaǵa shaqyra otyryp, sol jerde sheshim joldaryn qarastyrýdy usynamyn», - dep túsindirdi Baýyrjan Seıitov.
Sóz sońynda ol «Astana LRT» JShS osy jyldyń 3 jáne 4 toqsanynda bólingen 8 problemaly baǵyt boıynsha qysqa marshrýttar engiziletinin aıtyp ótti. Onyń arasynda Sársembaı Myńbaev aıtyp ótken №24 baǵyttaǵy kólik te bar. ıAǵnı, qysqa marshrýtty qoǵamdyq kólikter qarbalas ýaqyttarda problemaly tustarda qyzmet kórsetedi. Bul óz kezeginde adam toly avtobýstardyń máselesin sheshýge septigin tıgizbek.
