Astanada taǵy eki Oqýshylar saraıy men mýzykalyq mektep salynady
ASTANA. KAZINFORM — Astana qalasynyń ákimi Jeńis Qasymbek jańa nysandardyń qaı mekenjaılarda salynatynyn aıtty.
Onyń sózinshe, qalanyń áleýmettik ınfraqurylymyn júıeli túrde damyp keledi, onyń ishinde jańa nysandardy salý da bar.
— Olar — mektepter, balabaqshalar, sport nysandary, stýdenttik jataqhanalar, medıtsınalyq mekemeler, oqýshylar saraıy jáne t. b. Máselen, bıyl biz jeke ınvestıtsııalar esebinen taǵy eki memlekettik Oqýshylar saraıyn jáne bir mýzykalyq mektep salyp, paıdalanýǵa berýdi josparlap otyrmyz. Olar myna mekenjaılarda ornalasady: Aqan seri jáne S189K kósheleriniń qıylysy (№ 106 orta mekteptiń janynda), M.Tólebaev kóshesi (№ 116 orta mekteptiń janynda), Syǵanaq kóshesi, № 17/41 (№ 101 orta mekteptiń janynda). Osyǵan deıin 3 Oqýshylar saraıyn salyp, paıdalanýǵa berdik. 2027 jyly osyndaı taǵy 2 nysan salyp, qoldanysqa berýdi josparlap otyrmyz, — dep jazdy Jeńis Qasymbek Instagram-daǵy paraqshasynda.
Budan buryn Astanada bilim berý uıymdarynda oqýshylardyń qaýipsizdigi qalaı qamtamasyz etiletinin jazǵan edik.