Astanada taǵy da bir kitaphana ashyldy
ASTANA. KAZINFORM - Astana qalasy máslıhatynyń tóraǵasy Erlan Kanalımov pen máslıhat depýtaty Baýyrjan Qasymbergebaev №8 kópshilik kitaphanasyn saltanatty túrde ashty, dep jazdy elorda ákimdiginiń resmı saıty.
Astana qalasy Ortalyqtandyrylǵan kitaphana júıesine qarasty jańa kitaphana Sh.Qosshyǵululy kóshesi, 8/2 mekenjaıynda ornalasqan. Kitaphananyń saltanatty ashylýyna mádenıet salasynyń ókilderi men kitaphana qyzmetkerleri de qatysty. Nysannyń ashylý barysynda kelýshiler kitaphana zaldaryna ekskýrsııa jasap, kitap qorymen tanysty.
«Kitaphana – bilim ordasy. Bul jerde ár adam óziniń jeke damýyna kóńil bólip, bilimin arttyrady. Kitaphana halqymyzdyń ádebı, mádenı jáne rýhanı damýyna ózindik úles qosyp keledi. Ótken jyly elorda ákimdigimen birlesip, máslıhat «Astananyń kitaphana júıesin damytýǵa arnalǵan keshendi josparyn» ázirlep, bekitti. Osyǵan deıingi 18 kitaphanamyzǵa kúrdeli jóndeý jasap, jańa formatta reformaladyq. Mine, osy ýaqytqa deıin 3 jańa kitaphana ashylsa, taǵy bir kitaphana óziniń ashylý kezegin kútip tur. Kelesi jyly da kitaphanalar sanyn odan ári kóbeıtýdi qolǵa almaqpyz. Oǵan qosa kitap qoryn kóbeıtý – negizgi maqsatymyz. Kitap bolǵasyn, ol qaǵaz júzinde bolý kerek. Kompıýterdegi kitapty oqyǵan qaǵaz kitapty oqyǵandaı bolmaıdy. Bul ekeýin adamnyń qabyldaýy da bólek, odan alar sezimi de basqasha», - dedi Erlan Kanalımov.
№8 kópshilik kitaphanasynyń kitap qory kórkemóner ádebıeti, entsıklopedııa jáne salalyq ádebıetten – barlyǵy 5 myńnan astam kitaptan quralǵan. Kitaphana 18 jastan joǵary oqyrmandardy qamtıdy.
Іs-shara aıasynda Astana qalasy ákimdiginiń Ortalyqtandyrylǵan kitaphanalar júıesiniń qurylǵanyna 50 jyldyq mereıtoıy jáne Qazaqstan máslıhattarynyń qurylǵanyna 30 jyl tolýyna baılanysty mekemeniń jas maman kitaphanashylary arasynda ótken «Men tańdaǵan mamandyq – kitaphanashy» atty baıqaý jeńimpazdaryn marapattaý rásimi ótti.
Astana qalasy máslıhatynyń tóraǵasy Erlan Kanalımov pen máslıhat depýtaty Baýyrjan Kasymbergebaev jeńimpazdar men qatysýshylarǵa júldelerin tabystady.
Shyǵarmashylyq baıqaý qorytyndysy boıynsha úshinshi oryndy kitaphanalyq protsesterdi avtomattandyrý qyzmetiniń mamany Arhat Abylǵazın, ekinshi oryndy №7 kitaphananyń aǵa kitaphanashysy Gaýhar Jumqazıeva, al birinshi oryndy kózi nashar kóretin jáne zaǵıp jandarǵa arnalǵan arnaıy kitaphana meńgerýshisi Abdýsamat Qýantaı ıelendi. Gran-prı men Dýbaıǵa joldamany №1 balalar kitaphanasynyń meńgerýshisi Gúlken Ahmetova jeńip aldy.
Ózge de baıqaýǵa qatysýshylarǵa sertıfıkattar men yntalandyrý syılyqtary berildi.
Aıta keteıik, qalanyń kitaphana jelisi 22 kitaphanadan turady, olardyń arasynda zaǵıp jáne nashar kóretin azamattarǵa arnalǵan kitaphana da bar. Qalalyq jeliniń kitap qory 800 myńǵa jýyq danany quraıdy. Máselen, qazirgi ýaqytta kitaphana qoryna berilgen kitaptar sany ótken jylmen salystyrǵanda 30%-ǵa artty, bul oqyrmandardyń ósýine de aıtarlyqtaı áser etti.
