Astanada taǵy bir kóshe jóndeýge jabylady
ASTANA. KAZINFORM — Astanada Qorǵaljyn tasjoly jóndeý jumysyna baılanysty ishinara jabylady, dep habarlaıdy qala ákimdiginiń baspasóz qyzmeti.
Astana qalasynyń Kólik jáne jol-kólik ınfraqurylymyn damytý basqarmasy Turan dańǵylynan Sh. Aıtmatov kóshesine deıingi ýchaskede Qorǵaljyn tasjolyna ortasha jóndeý júrgizedi.
— Osyǵan baılanysty, 24 sáýir men 15 mamyr aralyǵynda atalǵan ýchaskede qozǵalys ishinara jabylady. Bul rette qozǵalys taraptardyń biri boıynsha eki baǵytta da uıymdastyrylatyn bolady. Júrgizýshiler men jaıaý júrginshiler qozǵalys baǵytyn aldyn ala josparlaýy jáne yqtımal ózgeristerdi eskerýi qajet. Qaýipsizdikti qamtamasyz etý jáne qolaısyzdyqty azaıtý úshin ýaqytsha jol belgileri men kórsetkishter ornatylatyn bolady, — delingen habarlamada.
Buǵan deıin Astanada masa men shirkeıge qarsy dezınsektsııalyq jumys júrip jatqany aıtyldy.