Astanada taǵy bir kóshe ýaqytsha jabyldy
ASTANA. KAZINFORM — Astanada Abaı dańǵylynyń bir bóligi ýaqytsha jabyldy, dep habarlaıdy qala ákimdiginiń baspasóz qyzmeti.
Abaı dańǵylynyń Respýblıka dańǵylynan A. Sembınov kóshesine deıingi ýchaskesinde joldyń ústińgi qabatyn tóseý jumysy júrgiziledi. Osyǵan baılanysty 18-22 mamyr aralyǵynda atalǵan ýchaskede qozǵalys ishinara jabylatyn bolady.
— Júrgizýshiler men jaıaý júrginshiler júrý baǵytyn aldyn ala josparlaýy jáne yqtımal ózgeristerdi eskerýi qajet. Qaýipsizdikti qamtamasyz etý jáne qolaısyzdyqty azaıtý úshin ýaqytsha jol belgileri men kórsetkishter ornatylatyn bolady, — delingen habarlamada.
Buǵan deıin elordada Jańajol kóshesinen Alash tasjolyna deıingi aralyq ýaqytsha jabylatyny týraly habarladyq. Bul aralyq búgin 07:00–de qaıta ashylatyn bolady.
Sonymen qatar qalada birneshe avtobýstyń qozǵalys syzbasy ýaqytsha ózgerdi.
