Astanada taǵy bir balalar travmotologııasy ashyldy
ASTANA. KAZINFORM – Nura aýdanynda taǵy bir balalar travmatologııalyq pýnkti ashyldy. Jańa travmpýnkt Hýseın ben Talal 14 mekenjaıynda Ulttyq shuǵyl medıtsınany úılestirý ortalyǵynyń bazasynda jumys isteıdi. Bul týraly Astana qalasynyń ákimdigi habarlady.
Osy ýaqytqa deıin elordada shuǵyl travmatologııalyq kómegi qalanyń oń jaǵalaýynda ornalasqan jalǵyz balalar travmpýnktinde kórsetilip, kezektiń kóbeıýine ákelip soqty.
– Balalarǵa hırýrgııalyq kómek kórsetetin jalǵyz statsıonar – №2 Kópbeıindi qalalyq balalar aýrýhanasy. Ol – elordanyń irgeles aýdandaryna da qyzmet kórsetetin balalar travmpýnkti bar jalǵyz statsıonar. Bul jaǵdaı naýqastardy jetkizý ýaqytyn uzartyp, kezektiń artýyna áser etti. Orta eseppen travmpýnktke táýligine shamamen 300 bala júginedi. Sol jaǵalaýda balalar travmpýnktiniń bolmaýy shuǵyl medıtsınalyq kómekke muqtaj balalar úshin kúrdeli másele týyndatty, - dep habarlaıdy Densaýlyq saqtaý basqarmasy.
Qalalyq Densaýlyq saqtaý basqarmasynyń málimetinshe, 2025 jyldyń sońynda elordadaǵy balalar sany shamamen 561 myńǵa jetken. Sonymen qatar, Esil jáne Nura aýdandarynda osy ýaqytqa deıin qosymsha balalar travmatologııalyq pýnkti ashylmaǵan.
– Osy máseleni sheshý maqsatynda Hýseın ben Talal kóshesi, 14 mekenjaıynda ornalasqan Ulttyq shuǵyl medıtsınany úılestirý ortalyǵynyń bazasynda jańa travmatologııalyq pýnkt ashý týraly sheshim qabyldandy. Jańa pýnktiń ashylýy qoldanystaǵy bólimshelerge túsetin júktemeni aıtarlyqtaı azaıtyp, elordanyń sol jaǵalaý turǵyndary úshin shuǵyl medıtsınalyq kómektiń qoljetimdiligin arttyrady, - dedi basqarma basshysy Aınur Tóleýova.
Qalanyń bas travmatologynyń aıtýynsha, travmpýnkt shuǵyl travmatologııalyq kómekke muqtaj patsıentterge qyzmet kórsetedi.
– Travmpýnktke statsıonarlyq emdeýdi qajet etpeıtin jaraqattarmen júginedi. Atap aıtqanda: tobyq býynynyń zaqymdanýy, shybyq súıeginiń synýy, tobyq synýlary, sondaı-aq ornyna salýdy jáne bekitýdi qajet etetin synýlar. Mundaı patsıentter keıin turǵylyqty jeri boıynsha emhanalarda em alyp, ońaltýdan ótedi, - dedi Alekseı Solod.
Basqarma málimetinshe, travmpýnkt zamanaýı medıtsınalyq qural-jabdyqtarmen jabdyqtalǵan jáne aýmaqqa kirýge yńǵaıly joldar qarastyrylǵan.
Aıta keteıik, Ulttyq shuǵyl medıtsınany úılestirý ortalyǵy Respýblıka boıynsha jedel medıtsınalyq járdem qyzmetin júzege asyrady. Onyń quramyna biregeı kópbeıindi aýrýhana kiredi. Sondaı-aq ortalyq sanıtarııalyq avıatsııa arqyly patsıentterge shuǵyl kómek kórsetedi.
Buǵan deıin Mańǵystaýda eldegi ekinshi biregeı jedel járdem stantsııasy ashylǵanyn habarlaǵan edik.