Astanada taǵam ónimderine arnalǵan kórme óz jumysyn bastady
STANA. Mamyrdyń 27-si. QazAqparat /Marlan Jıembaı/ - Búgin elordadaǵy Kongress-Holl saraıynda «InterFood Astana 2010» - «Taǵam ónimderi. Ingredıentter. Sýsyndar. Qaptamalar jáne taǵam ónerkásibine arnalǵan jabdyqtar» atty 12-shi qazaqstandyq-halyqaralyq kórmeniń ashylý rásimi ótti.
Sharanyń ashylý saltanatyna qatysqan QR Aýyl sharýashylyǵy vıtse-mınıstri Arman Evnıev elimizdiń aýyl sharýashylyǵy salasyna memleket tarapynan, Elbasy tarapynan úlken kóńil bólinip otyrǵandyǵyn, qazir ýaqytta arnaıy memlekettik baǵdarlama qabyldanǵandyǵyn atap ótti. «Baǵdarlamanyń 7 baǵytynyń arasynda eń alǵashqy basymdyq aýyl sharýashylyǵyna berilip otyr. Al bizdiń osy saladaǵy alǵa qoıǵan maqsattarymyz - birinshiden elimizdiń azyq-túlik qaýipsizdigin qamtamasyz etý, ekinshiden ónimniń shyǵymdylyǵyn eki ese kóbeıtý, úshinshiden eksporttyq áleýetimizdi joǵary deńgeıge kóterý jáne eksporttyq naryqtarǵa shyǵý», dedi A.Evnıev.
Uıymdastyrýshylardyń atap ótýinshe, kórmege álemniń Belarýs, Reseı, Ýkraına, Chehııa, Japonııa, Túrkııa, Latvııa, Tájikstan, Koreıa, Qazaqstan memleketteriniń 60-tan astam kompanııalary qatysýda. Qatysýshylardyń 49 paıyzyn - otandyq óndirýshiler, 33 paıyzyn - reseılik kompanııalar, qalǵanyn sheteldik kompanııalar quraıdy. Atap óterligi aǵymdaǵy jyly bul shara barysynda qatysýshylardyń 74 paıyzy alǵash ret kelip otyr.
Kórmege taǵam ónimderi, taǵam óndirýshi jáne qaıta óńdeýshi ónerkásipke arnalǵan tehnologııalar, qaptama materıaldar qoıylǵan.
QR Aýyl sharýashylyǵy, Ekonomıkalyq damý jáne saýda mınıstrlikteri, elimizdegi Reseıdiń saýda ókildigi, Astana qalasynyń saýda-ónerkásip palatasy qoldaýymen ótip jatqan shara mamyrdyń 29-yna deıin jalǵasady.
