Astanada tabylǵan mamonttyń azý tisi Táýelsizdik saraıynyń murajaıyna qoıylady
ASTANA. Qazannyń 28-i. QazAqparat /Gúlmıra Álıakparova/ - Keshe Astananyń qaq ortasynda tabylǵan mamonttyń azý tisi Táýelsizdik saraıynyń murajaıynda saqtalatyn bolady.
Bul týraly búgin QazAqparat tilshisine bergen suhbatynda L.Gýmılev atyndaǵy Eýrazııa ulttyq ýnıversıteti janyndaǵy K.Aqyshev atyndaǵy arheologııalyq ǴZI-dyń aǵa ǵylymı qyzmetkeri Serǵazy Sákenov aıtty, dep habarlaıdy QazAqparat.
Esterińizge sala keteıik, keshe qazannyń 27-si kúni Astana qalasynyń sol jaǵalaýynda boı kóterip jatqan «Izýmrýdnyı» turǵyn úı kesheninde qurylys jumystaryn júrgizý barysynda jumysshylar mamonttyń tisin tapqan bolatyn. Qundy olja dereý K.Aqyshev atyndaǵy arheologııalyq ǵylymı zertteý ınstıtýty mamandarynyń qolyna tapsyryldy.
«Anyqtalǵandaı, tabylǵan jádiger Astana aýmaǵyn bizdiń eramyzdan 1-1,5 mıllıon jyl buryn mekendegen mamonttyń azý tisi, onyń uzyndyǵy - 32 sm, tamyrynyń uzyndyǵy - 21 sm, al eni - 8,5 sm», deıdi ol. Eń qyzyǵy, tistiń salmaǵy 4 keli. Ǵalymdardyń aıtýynsha, tis tastanyp ketkendikten de aýyr bolýy múmkin. Endi tarıhı jádigerdi kez kelgen turǵyn Táýelsizdik saraıyndaǵy Astana qalasynyń tarıhyna arnalǵan murajaıdan kóre alady.
Aıta keteıik, bul elordany salý barysynda tabylǵan jalǵyz arheologııalyq olja emes, ústimizdegi jylǵy qyrkúıek aıynda naq osy «Izýmrýdnyı» turǵyn úı kesheniniń mańynan mamonttyń 1 metr 32 santımetr bolatyn múıizi, al aldyńǵy jyly Aqorda janyndaǵy kópirdi turǵyzý barysynda osyndaı mamonttardyń taǵy 2 múıizi tabylǵan edi. Ár jyldary Astana aýmaǵynda tabylǵan bul alyp janýardyń múıizderi beseý bolyp otyr.
Instıtýt dırektory Maral Habdýlına, «ókinishke qaraı, osy ýaqytqa deıin tabylǵan artefaktardyń ishinde ǵalymdardyń qolyna túskeni tek mamonttyń tisi ǵana», deıdi. Qalǵandary olardy tapqan jumysshylardyń qolynda qalǵan. «Bizde arheologııalyq mańyzdy zattar úshin syıaqy berýdi qarastyratyn zań bar, biraq ol jumys istemeıdi. Tipti, el aýmaǵynda jerdi qazýǵa qatysty qandaı da bir jumystardy bastamas buryn, qujattar toptamasynda sol jer tekserilgendigi jáne onda eshqandaı tarıhı eskertkishter tabylmaǵandyǵy týraly arheologtyń saraptamalyq qorytyndysy bolýy tıis. Al bizge osy ýaqytqa deıin eshbir organ mundaı jumystardy júrgizý ótinishimen kelgen joq», deıdi ol.
