Astanada «Təńirtaýdan bastalǵan qubylys» atty sýret kórmesi ótti

Astana tórinde ashylǵan bul óner kórmesine qoıylǵan shyǵarmalar shynaıylyǵymen, qanyqtyǵymen, qarapaıymdylyǵymen, beıneleý dáldigimen kórmege kelgen jurttyń ystyq yqylasyna bólendi. Avtordyń ərbir týyndysy tabıǵatty, týǵan jerdi, aýyl tirshiligin arqaý etkenimen erekshelendi.

«Kórmege shyǵarmalarymnyń bir bólimin, ıaǵnı 65 týyndymdy qoıdym. Bul meniń shyǵarmashylyqpen aınalysqanyma 20 jyl tolýyna oraı esep berý kórmem boldy. Meniń ustanǵan baǵytym realıstik baǵyt. týyndylarymda óz týǵan ólkemniń taýy men tasyn, sýy men ózenin, ormany men toǵaıyn kenep betine bederlep túsirýge den qoıdym. Osy arqyly bolashaq urpaq óz týǵan jerin qadirlep, qazaqtyń baıtaq dalasynyń kıesin sezinip ósse degen maqsat qoıdym. Sonymen birge ultymyzdyń salt- sanasyn, ǵuryp- ádetin, turmys-tirshiligin shyǵarmalaryma ózekti mazmun ettim. Men Uly dalanyń taǵdyrly tabıǵatyn, kórikti kólderin, zańǵar bıik taýlaryn, jasyl jelekti jaılaýlardyń tańǵajaıyp ásem kórinisterin tamashalaı otyryp, ózim sezingen, túısingen áserimdi kenepke jazyp, kórkem týyndy jaratýǵa talpynyp kelem. Bul meniń bolymysym, basty ereksheligim», - deıdi sýretshi Serikjan Ysqaqbekuly.

Kórmeniń ashylýyna arnaıy kelip qatysqan Qazaq ulttyq óner ýnversıtetiniń professory, sýretshi Asylhan Ermekov Serikjan Ysqaqbekulynyń eńbekterine óz baǵasyn berip, shyǵarmashylyq jolynyń nátıjeli, jemisti bolýyn tiledi.  

«Serikjannyń óziniń ómirlik baǵyty osy keskindememen baılanysty ekeni týǵan kezde berilgen sııaqty. Ol tabıǵattyń alýan kórinisin, qubylys ózgerisin, tabıǵatqa jan bitirgendeı áserli beıneleıdi. Men kórmeni birneshe ret aralap shyqtym. Onyń kóptegen jumystaryn salystyra otyryp fılosofııalyq, psıhologııalyq mánge ıe ekenin ańǵardym. Tabıǵattyń tilin túsinip, oǵan jan bitirý degen óte qıyn, kúrdeli dúnıe. Bul jerde keskin, ıa bolmasa syzyq, kompozıtsııalyq shyǵarmashylyǵyndaǵy jemisti jumysyn baǵalaýmen qatar, sonyń ishindegi emotsııalyq jáne dúnıe bolmysynda bolyp jatqan qubylystardy kenep betine sátti túrde, kúrdeli mánermen bederlep shyǵýyn da jetistik dep aıta alamyz. Bunyń barlyǵy úlken sheberlik jáne úlken ǵylmı turǵyda jasalǵan eńbekter dep esepteımin, sonymen birge Serikjannyń qajyrly eńbeginiń nátıjesi. Tabystan tabysqa jete ber dep tilek aıtamyn», - deıdi sýretshi Asylhan Ermekov.

 
Serikjan Ysqaqbekuly - QHR Shyńjań sýretshiler odaǵynyń múshesi. Onyń qazaqtyń kóshpeli ómiri men ulttyq mádenıetin beınelegen «Naýryz», «Kúz», «Qystaýlyq», «Kúz kelbeti» taqyrybyndaǵy maıly boıaý týyndylary Shyńjańdyq sýretshiler festvalinde joǵary baǵalanyp, marapattalǵan. Al, «Urshyq ıirý» atty maıly boıaý týyndysy 2004 jyly QHR memlekettik sýretshiler odaǵy jaǵynan uıymdastyrylǵan kásibı sýretshiler konkýrysynda ІІ orynǵa, «Narat saharasy» atty maıly boıaý týyndysy 2006 jyly Shyńjań, Haınan, Iunnan úsh ólke boıynsha ótken sýretshiler festvalinde ІІІ orynǵa ıe bolady. Serikjannyń óz qolymmen jasaǵan 300-ge jýyq dombyra, qobyz, jetigen, barbyt, sherter sııaqty qazaqtyń mýzykalyq aspaptary Shyńjań kólemindegi óner adamdarymen qosa mádenıet oryndarynda paıdalanýda. 

 2012 jyly Qytaıdyń arnaıy ákimshilik aımaǵy Makaoda uıymdastyrylǵan mádenıet jármeńkesine qazaqtyń mýzykalyq aspaptaryn jasaýshy sheber retinde QHR-nan arnaıy qatysyp, úzdik baǵalanǵan jumystary úshin, QHR Mádenıet mınistirliginiń arnaıy alǵys hatyn alǵan. Qazaqstanda 2015 jyly shetelde turatyn qandastarymyzdyń qatysýymen ótken halyqaralyq óner festıvalinde II oryn alsa, osy jyly «Ymyrt» atty shyǵarmasy ulttyq mýzeıdiń altyn qoryna saqtalyp, alǵys hatpen marapattalady.