Astanada synǵan tehnıkany úıden tegin alyp ketetin taksı iske qosyldy
ASTANA. QazAqparat - Astana qalasynda qoqysty iriktep laqtyrý aktsııasy aıasynda 405 keli makýlatýra, 120 keli plastıkalyq bótelke, 100 keli shyny, 300 keli elektrondy qurylǵylar jınaldy, dep habarlaıdy QazAqparat ákimdik saıtyna silteme jasap.
Elordada ótken senbi kúni ótken «Qaıta óńdeý!» eko-asarynyń qorytyndysy shyǵaryldy.
Qaldyqty bólip tastaý jónindegi pılottyq jobany qoldaýǵa qalanyń júzdegen turǵyny qatysty. Olar shyny (100 keli), plastık bótelkeler (120 keli), makýlatýra (405 keli), synapty shamdar (85 keli) men batareıalar (14 keli), isten shyqqan turmystyq tehnıkalar men elektrondy quraldardy (300 keli) - bas-aıaǵy 1044 keli qaldyqty qaıta óńdeýge jáne joıýǵa ótkizgen.
Uıymdastyrýshylardyń aıtýynsha, sharaǵa qatysqandardyń kópshiligi qaıta óńdeýge keletin buıymdardy sanaly túrde alyp kelgen. Sondaı-aq, bul bastamaǵa iri kompanııalar da qyzyǵýshylyq bildirgen. Máselen, «Samruq-Energo» AQ qyzmetkerleri 125 kg keńse qaǵazy men plastıkalyq qaldyqtardy qaıta óńdeýge tapsyrǵan.
Shara aıasynda isten shyqqan turmystyq elektr tehnıkalaryn tegin alyp ketetin jańa ekologııalyq «Clean taxi» jobasy tanystyryldy. Aktsııa aıasynda jınalǵan qaldyqtar Astana qalasyndaǵy qaıta óńdeý zaýytyna jiberildi.
Eske sala ketsek, Astana qalasy ákimdigi men Óndirýshilerdiń keńeıtilgen mindettemesiniń operatory qatty turmystyq qaldyqtardy eki fraktsııaǵa (qurǵaq jáne ylǵaldy) bólip tastaýdyń ilki jobasyn engizýdi bastady.
Ákimdik keltirgen derekterge sáıkes, 2018 jyldyń shilde aıynan bastap qaladaǵy 2070 qoqys alańyna 6 275 konteıner qoıylady. «Sary» jáne «jasyl» tústi konteınerlerge turmystyq qaldyqtar suryptalyp tastalady. Atap aıtqanda, sary tústi konteınerge qaıta óńdeýge jaramdy (metall, plastık, qaǵaz, shyny) qaldyqtar tastalsa, jasyl konteınerge tamaq qaldyqtary, organıkalyq jáne basqa da óńdeýge kelmeıtin qaldyqtar salynady.
