Astanada sý jelilerin jańartýǵa 15,7 mlrd teńge ınvestıtsııa baǵyttaldy
ASTANA. KAZINFORM — Astanada sý qubyrlary men káriz jelilerin jańartý jumystary júrip jatyr. Aldaǵy bes jylda bul baǵytqa 15,7 mlrd teńge bólinedi. Qarajat eskirgen qubyrlar men jabdyqtardy aýystyrýǵa, apattardy azaıtýǵa jáne qala turǵyndaryn sýmen turaqty qamtýǵa jumsalady.
Búgin osy jumystardyń barysyn kórsetý úshin baspasóz týry ótti. Jýrnalıster Qaraótkel shaǵyn aýdanyndaǵy sý qubyry jelilerin jańǵyrtý jumystarymen tanysty.
Sondaı-aq sharada kásiporyn satyp alǵan arnaıy tehnıkalar kórsetildi.
Bıyl bul maqsatta 4,9 mlrd teńge qarastyrylǵan.
Qarajattyń bir bóligi 800 metr káriz jelisin salýǵa jumsalyp, bul jumys tolyq aıaqtalǵan.
Taǵy 6,9 shaqyrym eski ári jıi apat bolatyn sý jelisin jańartý josparlanǵan. Onyń 5,4 shaqyrymy jańartyldy. Bul jumystarǵa 2 mlrd teńge jumsalǵan.
Budan bólek, 8 nysandaǵy 20 sorǵy, sondaı-aq káriz júıesindegi taǵy 11 sorǵy jańartylady. Oǵan 600 mln teńge bólingen. Kásiporyn jańa arnaıy tehnıka men qajetti jabdyqtar da satyp alyp jatyr.
Mamandardyń aıtýynsha, eski qubyrlardy jańartý qaladaǵy apat sanyn azaıtyp, sýdyń úzdiksiz berilýine múmkindik beredi.
— Jańǵyrtý jumystary aıaqtalǵannan keıin apattyq jaǵdaılar aıtarlyqtaı azaıady dep kútiledi. Barlyq qubyr jańartylǵan soń, olar shamamen 20 jyl boıy qalypty jumys isteı alady. Qazir qala turǵyndarynan táýligine orta eseppen 50-ge jýyq apatqa qatysty ótinish túsedi. Jańǵyrtý nátıjesinde bul kórsetkishti 20 paıyzǵa tómendetýdi josparlap otyrmyz, — dedi «Astana sý arnasy» MKK bas dırektorynyń birinshi orynbasary Erjan Sháripov.
2021-2025 jyldary «Astana sý arnasynyń» ınvestıtsııalyq baǵdarlamasyna 10,2 mlrd teńge jumsalǵan.
Eske sala keteıik, buǵan deıin Astanada elektr jelilerin jańǵyrtýǵa 8,5 mlrd teńge ınvestıtsııa baǵyttalǵany týraly jazǵan edik.
