Astanada Súıinbaı Aronulynyń týǵanyna 200 jyl tolýyna arnalǵan mádenı-tanymdyq kesh ótti (FOTO)
Bul týraly «Nur Otan» partııasynyń baspasóz qyzmeti habarlady.
Túbi bir túrki halyqtaryna ortaq tulǵaǵa arnalǵan keshke Qazaqstannyń, Qyrǵyzstannyń, Ózbekstannyń tanymal ǵalymdary men ónerpazdary qatysty.
Jıyndy "Nur Otan" partııasy Tóraǵasynyń birinshi orynbasary Baýyrjan Baıbek quttyqtaý sóz sóılep ashty. Qyrǵyzstan Ulttyq Ǵylym akademııasynyń vıtse-prezıdenti, akademık Abdyldajan Aqmatalıev, Halyqaralyq Túrki akademııasynyń prezıdenti Darhan Qydyráli baıandama jasady.
Budan keıin keshti Súıinbaı muralaryn oryndaýshylar jalǵastyrdy. Atap aıtqanda, belgili ónerpazdar Saıat Medeýov, Aqan Ábdýáli, Erbolat Shaldybekov, Jylbek Toqtasynov, Elikbaı Isa, Damır Abashev, sondaı-aq, Ózbekstannan kelgen jyrshy Jánibek Pııazovtyń oryndaýyndaǵy án men jyrdy kórermen jyly qabyldady.
Sonymen qatar, Ǵ.Jubanova atyndaǵy memlekettik shekti aspaptar kvarteti, "Súıinbaı sazy" follkorlyq-etnografııalyq ansambli, "Qorqyt ata" atyndaǵy jetigenshiler ansambli, Qazaq Ulttyq óner akademııasynyń sımfonııalyq orkestri qatarly óner ujymdary da Súıinbaı týyndylaryn zamanaýı sıpatta oryndap, kórermen yqylasyna bólendi.
Kontserttik baǵdarlamanyń aıryqsha jańalyǵy - Súıinbaı jyrlarynyń túrki dúnıesine ortaq sanalatyn baıyrǵy qobyz sarynynan bastap búgingi klassıkalyq mýzykamen ushtastyryla oryndalýy boldy.
Arnaıy shaqyrylǵan Súıinbaı urpaqtary saltanatty keshtiń kýási boldy.
Aıta ketý kerek, alqaly jıynnyń ótýine "Nur Otan" partııasymen qatar Almaty oblysynyń Jambyl aýdany ákimdigi jáne Qazaq Ulttyq óner ýnıversıteti qoldaý kórsetti.
Osy keshke oraılastyryp, Halyqaralyq Túrki akademııasy Súıinbaı men Tezek tóre aıtysynyń aýdıodıskisi men "Alataýdyń aqıyǵy - Súıinbaı" atty jınaqty kesh qonaqtaryna tartý etti.
