Astanada sút beziniń qaterli isigin der kezinde anyqtaý jáne emdeý máselesi talqylandy
ASTANA. 28 qańtar. QazAqparat /Jasulan Amanbaıuly/ - Ulttyq ana men bala ortalyǵy sút beziniń qaterli isigin der kezinde anyqtaý jáne emdeýge baǵyttalǵan jańa jobany engizýde. Búgin atalmysh joba «Sút beziniń obyryn dıagnostıkalaýdaǵy jáne emdeýdegi zerttemeler men tehnologııalar - eýropalyq standarttar» atty dóńgelek ústel otyrysynda talqylandy.
DDSU ókilderi, Densaýlyq saqtaý mınıstrliginiń jáne Ulttyq ana men bala ortalyǵynyń mamandary Qazaqstanda áıelderdiń reprodýktıvti densaýlyǵynyń onkopatologııasy keń tarap, ózekti máselelerdiń birine aınalyp otyrǵandyǵyn atap kórsetýde. Sút beziniń qaterli isigi onkologııalyq aýrýlardyń arasynda ekinshi orynǵa kóterilip otyr. Dúnıejúzilik densaýlyq saqtaý uıymynyń málimetterine súıensek, álemde sút bezi qaterli isigine 1,5 mıllıon áıel shaldyǵady.
Osyǵan baılanysty Ortalyq qaterli isikti erte anyqtaýdy jaqsartý jáne emdeýdiń jańa amal-tásilderin engizý arqyly ólim sanyn azaıtý múmkindigine qol jetkizýdi josparlaýda.
«Elimizde 2015 jylǵa deıin baǵyttalǵan «Salamatty Qazaqstan» baǵdarlamasynyń qabyldanýy óte mańyzdy ról atqarady. Baǵdarlamanyń aıasynda ulttyq skrınıgtik júıeni damytý, dertti erte bastan anyqtaý salasynda birqatar ilki jobalardy qolǵa alý kózdelýde. Búgin biz Almaty men Avstrııadan kelgen áriptesterdi shaqyryp, osy taqyrypta olardyń pikirleri men tájirıbelerin tyńdasaq deegen oımen basqosý uıymdastyrdyq», - dedi «Ulttyq medıtsınalyq holdıngi» AQ basqarma tóraǵasy Eljan Birtanov.
Dóńgelek ústel barysynda Ulttyq ana men bala ortalyǵynyń bazasynda sút beziniń qaterli isigin erte bastan anyqtaý jáne emdeý boıynsha jańa ádisterdi qamtıtyn, eýropalyq standarttarǵa saı aýqymdy jobany iske asyrýdyń kezeńderi men negizgi mazmuny pysyqtalmaq.
